ԵՐԵՎԱՆ, 17 ապրիլի — Sputnik. Թուրքիայում խորհրդարանականից նախագահական կառավարման համակարգի անցնելու կողմնակիցներն արդեն հաղթանակ են տոնում։ Այս մասին տեղեկացնում է ՌԻԱ Նովոստին։
Նախնական արդյունքների համաձայն` քվեարկության մասնակցած քաղաքացիների ձայների 98 տոկոսի հաշվարկի արդյունքում պարզ է դարձել, որ սահմանադրական բարեփոխումներին կողմ է քվեարկել 51.3 տոկոսը, դեմ` 48.5:
Թուրքիայի 81 նահանգից 48-ում նախագահական համակարգի անցնելու կողմնակիցներն առաջատար դիրքեր են զբաղեցրել: Դեմ են քվեարկել հիմնականում քրդերով բնակեցված հարավարևելյան շրջաններում:
Ոչ մեծ տարբերությամբ, բայց Ստամբուլում և Անկարայում առաջատար են սահմանադրական բարեփոխումների հակառակորդները։
Երկրի գլխավոր ընդդիմադիր ուժը` Ժողովրդադեմոկրատական կուսակցությունը, համաձայն չէ նախնական արդյունքների հետ և պահանջում էր քվեների 60 տոկոսի վերահաշվարկ անել: Ըստ նրանց` հիմնական խախտումներ գրանցվել է անվավեր քվեները հաշվարկի հարցում։
