Շաբաթվա մարդիկ

Մագի Զինգմարկ

4 տարի սովորել է Հակոբ Կոջոյանի անվան գեղարվեստի դպրոցում, պատրաստվում է ուսումը շարունակել Երևանի Գեղարվեստի պետական ակադեմիայիում:

-Երբ փոքր էի, երազում էի դերասանուհի դառնալ: Սիրում էի կերպարանափոխվել ու դառնալ իմ սիրած հերոսներից մեկը: Սովորական մատիտը դառնում էր կախարդական փայտիկ «Հարի Փոթեր» ֆիլմից:

Ապագայում ցանկանում է ճանաչված և սիրված մուլտկերպարների հեղինակ լինել:

Նիկոլայ Թորոսյան

Մասնագիտությամբ լրագրող Է: Շուրջ 7 տարի (ընդմիջումները բացառելով) աշխատում է մասնագիտությամբ:

-Փոքր տարիքում նման զբաղմունքի մասին չեմ էլ մտածել. ուզում էի կամ ճարտարապետ դառնալ, կամ օդաչու: 2 տարբերակն էլ բացառված էր տեսողությանս ու մաթեմատիկայի ոչ բավարար իմացության պատճառով:

Աշխատում է ապագայի հետ կապված ծրագրեր չկազմել: Ցանկանում է հնարավորինս շատ ճամփորդել, ու վերջ:

Լևինա (Իզաբելլա Լուեն)

«Եվրատեսիլ» երգի մրցույթում Գերմանիայի մասնակիցն է: Երաժիշտ, երգիչ և երգահան: Երգի ասպարեզում առաջին քայլերն արել է 9 տարեկանում:

-Կարելի է ասել, որ մանկությանս երազանքն իրականացել է՝ դարձել եմ երգչուհի:

«Եվրատեսիլից» հետո ինչ էլ որ լինի, ապագայում ցանկանում է շրջագայել ու համերգներով հանդես գալ:

Քրիստիան Բատիկեան

Գրող է։ Թեև արդեն բավական տարիներ ի վեր նրա ստեղծագործությունները հրապարակվում են աշխարհի չորս ծայրերում լույս տեսնող գրական մամուլում, բայց առաջին գիրքը («Սուփըր հերոսները կը մեռնին ամրան») լույս ընծայվեց միայն մի քանի ամիս առաջ։

-Փոքր ժամանակ չկար մի հստակ բան, որ ուզում էի դառնալ:

Արևմտահայ գրականության ծագող աստղը չի սիրում խոսել իր անձի, իր ծրագրերի, առավել ևս ապագայի մասին։

Լուսինե Քասարջյան

Մասնագիտությամբ լեզվաբան-մանկավարժ է: Սովորել է Computer Arts/New Media-ում:

Շուրջ 3 տարի է՝ աշխատում է Հայաստան Ծառատունկ Ծրագրում (Armenia Tree Project): 1994-ից սկսած՝ տնկել են միլիոնավոր ծառեր Հայաստանի Հանրապետությունում և Արցախում` անտառների և հանրային այգիների տեսքով:

Բացի այդ, իր մասնագիտական և խորհրդատվական կարողությունները տրամադրում է շահույթ չհետապնդող կազմակերպություններին:

-Երբ փոքր էի, երազում էի տիեզերագնաց, հնէաբան, օվկիանոսագետ և անտուն կենդանիների ապաստարաններ կառուցող լինել:

Հուսով է, որ ապագայում կկարողանա օգտակար լինել շրջակա միջավայրին, կառուցել և համադրել կենդանիների, որբերի և զառամյալների ապաստարանները: Ցանկանում է մարդու և բնության խաղաղ և փոխհարգալից համագործակցության նոր ուղիներ գտնել:

Տիգրան Ամիրյան

Բանասիրական գիտությունների թեկնածու, Համաշխարհային գրականության ու մշակույթի ամբիոնի դասախոս։

2012 թ-ին թեկնածուական ատենախոսությունը պաշտպանել է Մոսկվայի պետական համալսարանի արտասահմանյան գրականության ամբիոնում։ Ավելի քան մեկ տարի է՝ ապրում և աշխատում է Երևանում:

-Երբ փոքր էի, երազում էի վիրաբույժ դառնալ, բայց կենսաբանությունն ու քիմիան դժվարությամբ էի յուրացնում։

Ինքնակենսագրական արձակի ուսումնասիրությանը զուգահեռ հետաքրքրվում է ժամանականից մշակույթում կիրառվող պատումային տարբեր վիզուալ միջոցներով։ Բացի այդ, առանց շտապելու կազմում է Երևանի թանգարանային քարտեզը։
Երազում է արաբերեն սովորել, ուզում է Երևանում գրադարանային կատարյալ տարածք ձևավորել և միջդիսցիպլինար հետազոտությունների լաբորատորիա բացել։ «Այսքանը՝ առաջիկա հեռանկարների մասին», - ասում է նա։

Զարուհի Սարիբեկյան

Մասնագիտությամբ լեզվաբան է, ավարտել է Երևանի պետական համալսարանը։ Լրացուցիչ կրթություն է ստացել Հարվարդի համալսարանում։ Աշխատում է մեդիայի և կոմունիկացիաների ոլորտում։

«Փոքր ժամանակ երազում էի փերի լինել։ Հավանաբար փերին ինձ գրավում էր և՛արտաքին տեսքով, և՛ կատարած գործերի բազմազանությամբ, և՛ ամենակարևորը՝ դրանք իրականացնելու հնարավորությամբ», - ասում է նա։

Ապագայում ծրագրում է սեփական պատրեկասրահ բացել ու զբաղվել սիրած գործով: