ԵՐԵՎԱՆ, 15 ապրիլի — Sputnik. Հայաստանի մայրաքաղաքն այն վայրերից է, որտեղ ռուսաստանցի զբոսաշրջիկները նախընտրում են նշել Սուրբ Հարության տոնը: Այս մասին հայտնում է Ռուսաստանի զբոսաշրջության դաշնային գործակալությունը:
Ավիատոմսերի որոնման ծառայություն մատուցող Biletix ընկերության ներկայացուցչի խոսքով՝ անցած տարվա համեմատ Զատկի տոնին ամրագրված տոմսերի քանակն ավելացել է 9 տոկոսով: Պահանջված ուղղությունների թվում են Սոչին, Սիմֆերոպոլը, Սանկտ Պետերբուրգը, Երևանը և Միներալնիե Վոդին:
«Նշված բոլոր քաղաքներում զբոսաշրջիկների և հավատացյալների համար գրավիչ կենտրոններ կան»,- նշված է Ռոստուրիզմի հաղորդագրության մեջ:
Զբոսաշրջային առաջարկներ ներկայացնող մյուս ծառայությունների ու տուրօպերատորների տվյալներով՝ զբոսաշրջիկները նախընտրում են իրենց հանգիստն անցկացնել նաև Հունաստանում, Աբխազիայում, Իտալիայում և Իսրայելում:
