ԵՐԵՎԱՆ, 15 ապրիլի — Sputnik. ՀՀ կենտրոնական ընտրական հանձնաժողովի որոշմամբ, ընտրություններին մասնակցող կուսակցությունների, կուսակցությունների դաշինքի հերթական համարները սահմանվել են անունների այբբենական հերթականությամբ: Այս մասին հայտնում է ԿԸՀ մամուլի ծառայությունը:
Ըստ այդ հաջորդականության՝ Երևանի ավագանու ընտրության ժամանակ քվեաթերթիկներում առաջինը նշված կլինի «Ելք» դաշինքը, երկրորդը՝ «Երկիր ծիրանի» կուսակցությունը, երրորդը՝ ՀՀԿ-ն:
Այսօր՝ ապրիլի 15-ին, գումարած արտահերթ նիստում ՀՀ կենտրոնական ընտրական հանձնաժողովը սահմանել է նաև Երևանի ավագանու 2017 թվականի մայիսի 14-ի ընտրություններին մասնակցող կուսակցություններին, կուսակցությունների դաշինքին նախընտրական քարոզչության ժամանակ հանրային հեռուստատեսությամբ և հանրային ռադիոյով եթերաժամ տրամադրելու կարգը, համաձայն որի, ընտրություններին մասնակցող կուսակցություններին, կուսակցությունների դաշինքին նախընտրական քարոզչության ժամանակ հանրային հեռուստատեսությամբ և հանրային ռադիոյով եթերաժամ տրամադրվում է հավասար պայմաններով:
Ըստ ԿԸՀ սահմանած կարգի` նախընտրական քարոզչություն իրականացնելու նպատակով հանրային հեռուստատեսությամբ եթերաժամ տրամադրվում է ժամը 19:15-ից, իսկ հանրային ռադիոյով եթերաժամ տրամադրվում է ժամը 21:15-ից։ Տեխնիկական անհրաժեշտությունից ելնելով` հանրային հեռուստատեսության կամ հանրային ռադիոյի կողմից նշված ժամանակահատվածը կարող է տեղաշարժվել, բայց ոչ ավելի, քան 30 րոպե։
Երևանի ավագանու ընտրություններին մասնակցող կուսակցությանը, դաշինքին նախընտրական քարոզչություն իրականացնելու նպատակով հանրային հեռուստատեսությունը տրամադրում է 30 րոպե անվճար և մինչև 50 րոպե վճարովի հիմունքներով եթերաժամ:
Երևանի ավագանու ընտրությանը մասնակցության հայտ է ներկայացրել քաղաքական 3 ուժ` ՀՀԿ-ն, «Ելքը» և նորաստեղծ «Երկիր ծիրանի» կուսակցությունը։ Երևանի ավագանու ընտրությունը կկայանա մայիսի 14-ին։
