ԵՐԵՎԱՆ, 14 ապրիլի — Sputnik. «Երալաշ» մանկական հումորային կինոամսագրի գեղարվեստական ղեկավար Բորիս Գրաչևսկին շատ է գնահատում ընկերոջ` Արկադի Գրիգորյանի նվերը։ Այս մասին Գրաչևսկին խոսել է «Вечерняя Москва» թերթին տված հարցազրույցում։
Չապլինի արձանիկը խորհրդանշում է այն մասնագիտությունը, որով Գրաչևսկին զբաղվել է գրեթե ամբողջ կյանքի ընթացում։
«Իմ սիրած արձանիկն է, ընկերոջս` Արկադի Գրիգորյանի նվերը, որը Հայաստանից եմ բերել։ Այս Չապլինը շատ լավն է, այնքան իսկական ու այնքան հեգնական։ Երևում է, որ այն շատ տաղանդավոր մարդ է պատրաստել»,- ասել է Գրաչևսկին։
Ռեժիսորի տանը «օտարերկյա» աստվածների բազմաթիվ դիմանկարներ և արձանիկներ կան։ Ավելի վաղ Sputnik ռադիոկայանին տված հարցազրույցում նա խոստովանել էր, որ սիրում է այցելել Երևան, քանի որ այստեղ ջերմություն ու բարեկամական վերաբերմունք է զգում իր և իր երկրի նկատմամբ։
