Աստծու համար իր ստեղծած բոլոր էակները ողջ են, առավել ևս՝ հին ու նոր մահացածներ չկան, ասում է տեր Պետրոս ավագ քահանա Մալյանը։
Նրա խոսքով՝ Զատկին բոլոր հավատացյալները, անկախ նրանից՝ տարիներ առաջ է մահացել տան անդամը թե վերջերս՝ պետք է ձու ներկեն ու չամչով փլավ պատրաստեն, սուրբ Հարության խորհուրդը վերաբերում է բոլորին։
Տեր Պետրոսը տարակուսեց՝ մեր ժողովուրդը սովորություն ունի արհեստական դժվարություններ ստեղծելու իր համար, հետո էլ սկսում է դրանք հաղթահարելու ճիգեր անել։ Այդ անհեթեթ, տարածված մոլորություններից մեկն այն է, որ իբր ձու չեն ներկում Զատկին, եթե տան անդամը նոր է մահացել։ Եկեղեցին ասում է ճիշտ հակառակը։
«Մայրս մահացել է 1960 թվականին, նշանակում է՝ չեմ հիշելո՞ւ նրան, քանի որ շուտ է մահացել։ Չի կարող լինել այդպիսի բան, ես նրան միշտ սիրում եմ ու հիշում»,- ասաց քահանան։
Հայ առաքելական եկեղեցու տաղավար տոներին հաջորդող երկուշաբթին մեռելոց է։ Մատուցվում է սուրբ պատարագ ննջեցյալների հիշատակին։
