ԵՐԵՎԱՆ, 14 ապրիլի — Sputnik. Երևանի ավագանու ընտրությանը կմասնակցի երեք քաղաքական ուժ: ԿԸՀ-ն ուրբաթ տեղի ունեցած նիստին գրանցեց ՀՀԿ-ի, «Ելք» դաշինքի և «Երկիր ծիրանի» կուսակցության ցուցակները:
ՀՀԿ համամասնական ցուցակը քաղաքապետի ընտրություններում կգլխավորի գործող քաղաքապետ Տարոն Մարգարյանը: Առաջին եռյակում են նաև միջազգային գրոսմայստեր Սմբատ Լպուտյանն ու Synopsys Armenia ՏՏ-ընկերության տնօրեն Հովիկ Մուսայելյանը:
«Ելք» ընդդիմադիր դաշինքի ցուցակը կգլխավորի պատգամավոր Նիկոլ Փաշինյանը, իսկ «Երկիր ծիրանի» կուսակցությունը` քաղաքական ուժի հիմնադիր Զարուհի Փոստանջյանը: Ապրիլի 21-ից սկսվում է նախընտրական արշավը, որը կտևի մինչև մայիսի 21-ը:
«Երևան քաղաքում տեղական ինքնակառավարման մասին» օրենքի համաձայն` ՀՀ մայրաքաղաքի քաղաքապետին ընտրում է ավագանին: Այն ձևավորվում է կուսակցական սկզբունքով՝ համաքաղաքային ընտրության հիման վրա, որոնք անցկացվում են համամասնական ընտրակարգով: Ավագանու ընտրությունը կանցկացվի 2017 թվականի մայիսի 14-ին:
