ԵՐԵՎԱՆ, 14 ապրիլի — Sputnik. Ռ Յոլյանի անվան արյունաբանական կենտրոնը կառուցել են իտալացի մասնագետները, և այն համապատասխանում է աշխարհի ամենախիստ չափանիշներին։ Այս համոզմունքն ունի առողջապահության նախարար Լևոն Ալթունյանը։ Ըստ նրա` խոսքը վերաբերում է ինչպես տեխնիկական հագեցվածությանը, այնպես էլ մասնագիտական պատրաստվածությանը։
«Մասնագետների պրոֆեսիոնալ մակարդակը վերահսկում են Արևմտյան Եվրոպայի առաջատար կենտրոնների առաջատար մասնագետները։ Հույս ունենք` ոչ մի բան չի խանգարի, որ մեկ-մեկուկես տարվա ընթացքում ունենանք կադրային և տարածքային, սարքավորումներով հագեցած միջազգային մակարդակի արյան կենտրոն։ Այսպիսի փարոսային ծրագրեր մենք նախատեսում ենք մեզ համար սուր ասպարեզներում»,- ասաց նախարարը։
Ալթունյանի խոսքով` կենտրոնն այս պահին ավելի շատ ծախսատար է, քան եկամտաբեր, հետևաբար դրան չի կարելի նայել որպես բիզնես մոդել։ Բայց արյունաբանական կենտրոնը շոգեքարշի պես իր հետևից կտանի զարգացած առողջապահական համակարգը։
«Մի քանի տարի հետո մեր կենտրոնը կարող է հավակնել ոսկրածուծի տարածաշրջանային փոխպատվաստման կենտրոնի անվանը։ Մենք հավակնում ենք, որ մեզ կդիմեն Վրաստանից, Իրանից, Ղազախստանից։ Այս հարցում դեր կունենա նաև բժշկական զբոսաշրջությունը»,-ասաց Լևոն Ալթունյանը։
Հիշեցնենք, որ այս շաբաթ Համբուրգից ժամանած պրոֆեսոր Նիկոլաուս Կրյոգերի ղեկավարությամբ Ռ. Յոլյանի անվան արյունաբանական կենտրոնում կատարվեց ոսկրածուծի առաջին փոխպատվաստումը։ Որոշակի ժաանակահատվածում պրոֆեսորը կվերահսկի բժիշկների վերապատրաստման որակը, բուժքույրերի ունակությունները և վերջնական արդյունքները։ Իսկ հետագայում օնլայն կապով կպահպանվի հայ և գերմանացի բժիշկների մասնագիտական փոխգործակցությունը։
