ԵՐԵՎԱՆ, 13 ապրիլի — Sputnik. Կառավարության աշխատակազմի ղեկավար-նախարար Դավիթ Հարությունյանը տեղեկացրեց, որ նախորդ տարվա ընթացքում Հայաստանում իրականացվել է յոթանասուն միլիարդ դրամի բարեգործական ծրագիր:
Դրանց մեծ մասը ծառայությունների մատուցման ձևով է, իսկ մյուս մասը` ապրանքների ներմուծման:
«Նախորդ տարվա համեմատ, ապրանքների ներմուծումը նվազել է չորս միլիարդ դրամի չափով, հիմնականում՝ ի հաշիվ դեղորայքի: Այնուամենայնիվ, ներմուծվող ապրանքների մոտ վաթսուն տոկոսը շարունակում են մնալ դեղորայքն ու բժշկական սարքավորումները»,- ասաց Հարությունյանը:
Ապրանքների մեծ մասը, նրա խոսքով, ներմուծվել է ԱՄՆ-ից, հետո Շվեյացարիայից, Չինաստանից և Իտալիայից:
