ԵՐԵՎԱՆ, 13 ապրիլի — Sputnik. Հայաստանի և Իրանի գործակցության փորձը կարող է օգտակար լինել նաև ԵՏՄ այլ անդամ-պետությունների համար, Sputnik Արմենիա մուլտիմեդիոն մամուլի կենտրոնում տեղի ունեցած Երևան-Աստանա-Բիշքեկ-Մինսկ տեսակապի ժամանակ ասաց Հայաստանի արդյունաբերողների և գործարարների միության գործադիր տնօրեն Էդուարդ Կիրակոսյանը։
«Իրանը Հայաստանի ամենախոշոր առևտրային և քաղաքական դաշնակիցներից մեկն է, որի հետ պետք է շարունակել ակտիվ գործակցությունն՝ անկախ իրանական շուկայում առկա բոլոր դժվարություններից»,- ասաց Կիրակոսյանը։
Նրա խոսքով` Հայաստանն ու Իրանը ներկա պահին համագործակցում են ազատ առևտրի միասնական գոտու ստեղծման նախագծի շուրջ, որը գործելու է հայ-իրանական սահմանին։ Դա ոչ միայն կնպաստի երկու երկրների միջև ապրանքաշրջանառության ծավալների մեծացմանը, այլև թույլ կտա տարբեր ոլորտներում խորացնել երկկողմ հարաբերությունները։
«Քանի դեռ չեն հանվել բոլոր պատժամիջոցներն Իրանի նկատմամբ, որոշակի դժվարություններ կան գործակցության առումով։ Սակայն անհրաժեշտ է մտածել տնտեսության հեռանկարների և իրանական 85-միլիոնանոց շուկայի մասին»,- ասաց Կիրակոսյանը։
ՀՀ Սյունիքի մարզում Հայաստանի և Իրանի միջև ազատ առևտրի գոտու ստեղծումը հնարավորություն կտա մեր երկրին՝ կապող օղակ դառնալ իրանական կողմի և ԵՏՄ-ի միջև։ Այդ կամրջից հետագայում կարող են օգտվել նաև եվրոպական բիզնեսի ներկայացուցիչները։ Ազատ առևտրի գոտու ստեղծման համար 32 մլն դոլար է անհրաժեշտ։
