ԵՐԵՎԱՆ, 13 ապրիլի — Sputnik. Իտալիայի մայրաքաղաքում գտնվող Տրևի շատրվանի` զբոսաշրջիկների շնորհիվ «աշխատած» 1,4 մլն եվրոն կուղղվի բարեգործական նպատակների, հայտնում է ՌԻԱ Նովոստին` հղում անելով La Repubblica իտալական թերթին։
Ոչ միայն Հռոմի, այլև Իտալիայի ամենամեծ և հայտնի շատրվանը գերում է հազարավոր զբոսաշրջիկների, իսկ շատրվանի մեջ մետաղադրամներ գցելու սովորությունը զբոսաշրջային ամենակարևոր ավանդույթներից մեկն է քաղաքում։ Համոզմունք կա, որ Տրևիի մեջ աջ ձեռքով և մեջքով կանգնած մետաղադրամ գցած մարդը կրկին Հռոմ կայցելի։
Զբոսաշրջիկների թողած գումարը կծառայի Caritas միջազգային կաթոլիկ բարեգործական կազմակերպությանը և կուղղվի չքավոր ընտանիքների համար սուպերմարկետներ, ճաշարան, կացարան կառուցելու նախագծի և այլն նպատակների իրագործմանը։
Առավել հաճախ շատրվանի ավազանում մարդիկ գցում են եվրո, դոլար և իեն, սակայն վերջին ժամանակներում առավել հաճախ է նկատվում ավստրալիական դոլարի առկայությունը։ 2016 թվականին, ընդհանուր առմամբ, հավաքվել էր 1.4 մլն եվրոյին համարժեք գումար։
Սա 100 հազարով ավելի է 2013 թվականից, երբ վերջին անգամ հրապարակեցին վիճակագրությունը։ Շատրվանի մեջ ոչ միայն գումար է ընկնում։ Caritas-ի տվյալներով, ավազանից տարբեր ժամանակ գտել են նաև Մարիամ Աստվածածնի և Հռոմի Ֆրանցիսկոս պապին պատկերող մեդալիոններ, բանալիներ, կողպեքներ, ապարանջաններ, մի շարք արևային ակնոցներ, ինչպես նաև… երկու դնովի ծնոտ։
Շատրվանի եկամուտը գերազանցում է Հռոմի միջին թանգարանի եկամուտը։ Օրինակ, Հռոմի ազգային թանգարանը տարեկան աշխատել է 1,1 մլն եվրո։ Հավերժական քաղաքի խորհրդանիշներից մեկի լայնությունը 20 մետր է, կենտրոնական հատվածում բարձրությունը` 26 մետր։