ԵՐԵՎԱՆ, 12 ապրիլի — Sputnik. Հայաստանի նախագահ Սերժ Սարգսյանը հայտարարել է, որ ՀԱՊԿ գործունեությունն ուղղված չէ առանձին պետությունների դեմ։
«Խոսքը կոլեկտիվ շահի մասին է, որը միասնական ուժերով է ստացվում։ Մեր մոտեցումն այդպիսին է, և որքան շուտ հարմարվի ՀԱՊԿ-ը ժամանակակից իրողություններին, այդքան ավելի լավ կլինի ՀԱՊԿ բոլոր մասնակիցների համար»,- Հավաքական անվտանգության մասին պայմանագրի ստորագրման 25-ամյակի նախաշեմին ասել է Սարգսյանը «ՄԻՐ» հեռուստառադիոընկերությանը տված հարցազրույցում։
«Պետությունները, որոնք ստորագրել են այն, ելնում էին ՀԱՊԿ-ի գոտում անվտանգության ապահովմանն ուղղված ուժերի համախմբման անհրաժեշտությունից, այդ պատճառով էլ այստեղ խոսքը չի գնում մասնավոր շահի մասին։ Հավաքական անվտանգության մասին պայմանագիրը ուղղված չէ որևէ մեկի դեմ»,- ասել է Սարգսյանը։
Ըստ նրա` խոսքը կազմակերպության շրջանակներում փոխշահավետ գործակցության մասին է։ ՀՀ նախագահը նշել է, որ ՀԱՊԿ զարգացումը շատ կարևոր է Հայաստանի և կազմակերպության մյուս անդամների համար։
ՀԱՊԿ-ը ստեղծվել է 2002 թ.-ին, և այժմ կազմակերպության կազմում վեց պետություն է ընդգրկված`Հայաստանը, Բելառուսը, Ղազախստանը, Ղրղըզստանը, Ռուսաստանը և Տաջիկստանը։ ՀՀ-ն ՀԱՊԿ-ի պայմանագիրը ստորագրել է 1992 թվականի մայիսի 15-ին։
