ԵՐԵՎԱՆ, 12 ապրիլի — Sputnik. Հայաստանի հանրային ծառայությունները կարգավորող հանձնաժողովն ապրիլի 12-ին համաձայնություն է տվել «Հայաստանի էլեկտրական ցանցեր» փակ բաժնետիրական ընկերության 70 տոկոս բաժնետոմսերի սեփականության իրավունքի՝ «Լիորմանդ հոլդինգզ լիմիթեդ» ընկերությունից «Տաշիր Կապիտալ» փակ բաժնետիրական ընկերությանը փոխանցելու գործարքին։ Այս մասին հայտնում է ՀԾԿՀ մամուլի ծառայությունը։
Այսպիսով, «Հայաստանի էլեկտրական ցանցերի» սեփականատերն այսուհետև «Տաշիր կապիտալ» ընկերությունն է, որը, մամուլի հրապարակումների համաձայն, գրանցված է կիպրոսյան օֆշորում, սեփականատերը ենթադրաբար «Տաշիր» ընկերությունների խմբի սեփականատեր Սամվել Կարապետյանն է:
Ժամանակին 100% պետական ընկերություն ՀԷՑ-ը կառավարության որոշմամբ սեփականաշնորհվել ու «Միդլենդ Ռեսուրսիս Հոլդինգ Լիմիթեդ» ընկերությանն էր հանձնվել 2002 թվականի օգոստոսի 26-ին կնքված «Հայաստանի էլեկտրական ցանցեր» փակ բաժնետիրական ընկերության բաժնետոմսերի վաճառքի պայմանագրով:
ՀՀ կառավարությունը ՀԷՑ-ը «Լիորմանդ Հոլդինգզ Լիմիթեդ» ընկերությանը վաճառելու որոշումը կայացրել էր 2015թ-ին:
