ԵՐԵՎԱՆ, 12 ապրիլի — Sputnik. Ապրիլի 14-ին, ժամը՝ 14:00-ին, «Նարեկացի» արվեստի միությունում ՀՀ սփյուռքի նախարարության «Դու ի՞նչ ես անում Արցախի համար» համահայկական շարժման շրջանակում տեղի կունենա Արսեն Հակոբյանի «Քառօրյա պատերազմ կամ ղողանջ լռության» խորագիրը կրող ֆիլմի ցուցադրությունը: Այս մասին հայտնում է hayernaysor.am-ը:
«Ֆիլմի ստեղծման ամենամեծ շարժառիթը քաղաքակիրթ աշխարհի անտարբերությունն է Արցախի հակամարտության լուծման հարցում: Այո, կա ԵԱՀԿ Մինսկի խմբի համանախագահների խումբ, որը, սակայն, կարծես կոչված է անհասցե հայտարարություններ անելու, որոնք ավելի շատ նման են լռության: Ինչպես ֆիլմում եմ նշել, հայ-ադրբեջանական հակամարտությունը ո´չ միայն ռազմի դաշտում է, այլև՝ տեղեկատվական, որտեղ, իմ կարծիքով, մենք շատ անելիքներ ունենք»,- ասել է ֆիլմի ռեժիսոր Արսեն Հակոբյանը:
Նրա խոսքով՝ աշխարհը քիչ տեղեկատվություն ունի այս հակամարտության մասին, ռեժիսորն այս ֆիլմով փորձել է հնարավորինս փակել այդ բացը:
Ֆիլմը ներկայացնում է Ապրիլյան քառօրյա պատերազմը, դրա պատճառները, հայ-ադրբեջանական հարաբերությունների պատմությունը, ինչպես նաև պատմական ակնարկ է տրվում Արցախի, Նախիջևանի և Ադրբեջանի մասին, որպեսզի աշխարհն ավելի ճիշտ տեղեկացված լինի:
«Ֆիլմի համար ոչ մի ֆինանսական աջակցություն չեմ ունեցել, օգնել են ընկերներս և ծանոթներս. մեկը անվճար աշխատել է, մյուսը՝ ինչ-ինչ հարցերում հնարավորինս մատչելի գներով օժանդակել,-նշեց Արսեն Հակոբյանը և հավելեց,- Այսօր ողջ հայության ուշադրությունը սևեռված է Արցախի վրա, և ամեն հայ պետք է հնարավորինս նեցուկ լինի Արցախին: Այս ֆիլմ էլ մեր թիմի աջակցությունն է, որով նաև մենք միանում են ՀՀ սփյուռքի նախարարության «Դու ի՞նչ ես անում Արցախի համար» համահայկական շարժմանը»:
