ԵՐԵՎԱՆ, 11 ապրիլի — Sputnik. Հայաստանի և Վրաստանի արտգործնախարարներ Էդվարդ Նալբանդյանի և Միխեիլ Ջանելիձեի երևանյան հանդիպման քննարկման թեմաներից մեկը ղարաբաղյան հակամարտությունն էր։
«Ես վրացի գործընկերոջս տեղեկացրել եմ Հայաստանի և ԵԱՀԿ ՄԽ համանախագահների այն գործունեության մասին, որն ուղղված է ղարաբաղյան խնդրի կարգավորմանը»,- Երևանում վրացի գործընկերոջ հետ ճեպազրույցի ժամանակ ասաց Նալբանդյանը։
Ըստ նրա` կարևոր է այն փաստը, որ Վրաստանը շարունակական աջակցություն է ցուցաբերում ԵԱՀԿ Մինսկի խմբի համանախագահների գործունությանը։
Կողմերը քննարկեցին նաև տարածաշրջանային ու միջազգային հարցեր։
Երկու երկրի նախարարները նշեցին հայ-վրացական հարաբերութունների առաջընթացը, մասնավորապես, տնտեսական ոլորտում` ընդգծելով միջպետական կոմիտեների իրականացրած արդյունավետ աշխատանքը։
Քննարկման հարցերի թվում էր նաև միջպետական պայմանագրերի իրագործումը առևտրի, տնտեսության, էներգետիկայի, տրանսպորտի ոլորտներում։
«Երկու կողմերն էլ պարբերաբար կրկնում են` Հայաստանի և Վրաստանի միջև չկան խնդիրներ, կան հարցեր, որոնք համատեղ ջանքերով լուծվում են։ Մեր այսօրվա հանդիպումը հենց դրա ապացույցն է»,- ասաց Նալբանդյանը։
Արտգործնախարարները քննարկեցին նաև Վրաստանում բնակվող հայերին հուզող հարցերը, քննարկեցին դրանց լուծմանն ուղղված քայլերը։
Նալբանդյանը խորհրդանշական համարեց այն, որ անցած տարի Ջանելիձեն ՀՀ արտգործնախարարության նոր շենքի առաջին հյուրն էր։
Միխեիլ Ջանելիջեն երկօրյա այցով Հայաստան է ժամանել ապրիլի 11-ին Էդվարդ Նալբանդյանի հրավերով։ Նրա հայաստանյան առաջին այցը կայացել է 2016 թվականի մարտին։
Այս այցի շրջանակում նա հանդիպում կունենա նաև ՀՀ նախագահ Սերժ Սարգսյանի և վարչապետ Կարեն Կարապետյանի հետ։
