Կիրակոսյանի խոսքով` եթե ավագանու ընտրություններից առաջ պայմանավորվածություններ չլինեին, ապա ՀՅԴ-ն ու «Ծառուկյան» դաշինքն անպայման կմասնակցեին ավագանու ընտրությանը։
Նշենք, որ Երևանի ավագանու ընտրությանը մասնակցության հայտ է ներկայացրել քաղաքական 3 ուժ` ՀՀԿ-ն, «Ելքը» և նորաստեղծ «Երկիր ծիրանի» կուսակցությունը։
Ըստ Կիրակոսյանի` իշխող Հանրապետական կուսակցության հավակնությունները, ինչպես ԱԺ ընտրությունների ժամանակ, մնում է նույնը. ՀՀԿ-ն փորձելու է գերակա ձայներ ստանալ, որպեսզի հետո վճռորոշ դեր ունենա քաղաքապետի ընտրության հարցում։
Նա չի բացառում նաև «Երկիր ծիրանի» կուսակցության և «Ելքի»` դաշինք կազմելու հավանականությունը։
«Կարծում եմ, որ Զարուհի Փոստանջյանն ու Նիկոլ Փաշինյանը պետք է խելամիտ լինեն և մրցակիցներից վերածվեն դաշնակիցների»,- ասաց Կիրակոսյանը։
Ըստ նրա, եթե Փոստանջյանն ու Փաշինյանը, որոնք երկուսն էլ չեն կաղում հռետորաբանության հարցում, այնուամենայնիվ պայքարեն իրար դեմ, նշանակում է` ավագանու ընտրություններից առաջ սուր մտքի փայլատակումների պակաս չի լինի։
