ԵՐԵՎԱՆ, 10 ապրիլի – Sputnik. Քանի դեռ ԱԺ նիստերի դահլիճում սպասում էին բացակա պատգամավորների գրանցվելուն, ԱԺ նախագահ Գալուստ Սահակյանը զբոսնում էր ԱԺ-ի բակում։ Բայց Գալուստ Սահակյանի անդորրը շուտով խանգարեցին լրագրողներն ու ընդդիմադիր պատգամավոր Զարուհի Փոստանջյանը։ Նախ պատգամավորը մոտեցավ ԱԺ նախագահին ու նրանից խնդրեց իր նորաստեղծ «Երկիր ծիրանի» կուսակցության գրասենյակին նվիրել ԱԺ-ից մեկ եռագույն դրոշ։
ԱԺ նախագահը չմերժեց, իսկ Զարուհի Փոստանջյանն ասաց, որ մեկական դրոշ էլ ԼՂ-ից և Արևմտյան Հայաստանից է խնդրելու։ Նախկին գործընկերոջ նորաստեղծ կուսակցությանը դրոշ խոստանալուց հետո ԱԺ նախագահը պատասխանեց նաև լրագրողների հարցերին։
Նա մասնավորապես հայտնեց, որ ՀՀԿ-ն դեռ չի քննարկել, թե ով է լինելու նորընտիր ԱԺ նախագահը։
«Երբ բոլորը ստանան մանդատները, այդ ժամանակ էլ կորոշենք` ով կլինի: Բոլորն էլ ինձ համար հավատարիմ մարդիկ են: Հնարավոր է` նաև Կարեն Կարապետյանը լինի», — ասաց նա՝ արձագանքելով լրագրողների հարցին, թե խոսակցություններ կան, որ Գալուստ Սահակյանին կարող է փոխարինել Տաշիրից ռեյտինգային ընտրակարգով ընտրված Կարեն Կարապետյանը։
Իսկ թե «այդ պարագայում ինչո՞վ կզբաղվի Գալուստ Սահակյանը» հարցին նա այսպես արձագանքեց. «Ինձ մի տեսեք այդ պաշտոնում, ինձ տեսեք որպես Գալուստ Սահակյան: Չեմ սիրում այս մրցակցությունը, որ հայ ժողովրդի մեջ կա, բոլորն ուզում են ամեն ինչ դառնալ: Ցանկացած հայ, որը 3-րդ, 4-րդ կամ 5-րդ դասարան է գնացել, մի քիչ եթե խորանաք, բոլորը ուզում են թագավոր դառնալ և նախագահ»։
Նշենք, որ ԱԺ այսօր նախանշված նիստը չկայացավ քվորումի բացակայության պատճառով։
