ԵՐԵՎԱՆ, 10 ապրիլի — Sputnik. Երևանի քաղաքապետ Տարոն Մարգարյանը վստահեցնում է` ապօրինի ծառահատում իրականացնողը պետք է ենթարկվի օրենքով սահմանված ամենախիստ պատժին։ Այս մասին նշված է Երևանի քաղաքապետարանի մամուլի ծառայության հրապարակած հաղորդագրության մեջ։
«Երեկ Դավթաշենում արձանագրված դեպքն ուղղակի վանդալիզմ է: Բոլորիդ է հայտնի ապօրինի ծառահատումների հետ կապված իմ դիրքորոշումը. ցանկացած նման դեպք պետք է օրենքով սահմանված կարգով պատժվի: Իսկ ա՛յս դեպքում ծառահատում իրականացնողները պետք է անպայման հայտնաբերվեն ու ենթարկվեն օրենքով սահմանված ամենախիստ պատժին»,- ասել է քաղաքապետը։:
Ըստ նրա` վարչական տույժի կիրառումն այս դեպքում բավարար չէ, և օրենքն էլ թույլ է տալիս նման դեպքերում քրեական պատասխանատվության ենթարկել օրինախախտներին:
Քաղաքապետը հանձնարարել է աշխատակազմի բնապահպանության վարչությանը, Դավթաշեն վարչական շրջանի ղեկավարին Երևան քաղաքի ոստիկանութան հետ համագործակցված հայտնաբերել մեղավորներին և նյութերը փոխանցել Երևան քաղաքի դատախազությանը՝ համապատասխան ընթացք տալու համար:
«Բոլորը պետք է իմանան, որ ցանկացած ապօրինի ծառահատում մեր կողմից երբեք չի արդարացվելու», — ընդգծել է քաղաքապետ Տարոն Մարգարյանը:
Նշենք, որ Դավթաշենի 4-րդ թաղամասի 46 շենքի բնակիչներն ահազանգել էին, որ իրենց շենքի հետնամասի այգու ծառերը հատում են ավտոսպասարկման կետ բացելու համար։
