ԵՐԵՎԱՆ, 10 ապրիլի — Sputnik. ԱԺ-ում այսօր ևս, ինչպես նախորդ 2 քառօրյա նիստերի ընթացքում, դահլիճում ներկա էին միայն եզակի թվով պատգամավորներ։
Ժամը 12։00-ին քվորում չլինելու պատճառով ԱԺ փոխնախագահ Հերմինե Նաղդալյանը նիստը հետաձգեց 3 ժամով։
ՕԵԿ և ՀՅԴ խմբակցություններն այսօրվա նիստին ընդհանարապես որևէ ներկայացուցիչ չունեին։
ԱԺ եկած պատգամավորների թվում էին Լևոն Զուրաբյանը, Արամ Մանուկյանը, Հովհաննես Սահակյանը, Մկրտիչ Մինասյանը, Նաիրա Զոհրաբյանը, Միքայել Մելքումյանը։
«ԱԺ կանոնակարգ» օրենքի համաձայն՝ նիստն իրավազոր է, եթե սահմանված կարգով գրանցվել է պատգամավորների ընդհանուր թվի կեսից ավելին (քվորումն ապահովված է)։ Եթե նիստն իրավազոր չէ, ապա գրանցումը շարունակվում է մինչև քվորում ապահովելը, բայց ոչ ավելի, քան 3 ժամ։
Խորհրդարանական ընտրությունների քարոզարշավի մեկնարկից ի վեր ԱԺ 2 քառօրյա նիստեր մարտ ամսին արդեն տապալվել են՝ քվորումի բացակայության հետևանքով։
