Տարիներ առաջ, երբ Խորհրդարանը մարտի 8-ը հանել է տոնացույցից՝ որպես Կլարա Ցետկինի սոցիալիստական գաղափարների ուղղորդում, այն ժամանակ ԱԺ պատգամավոր Հրանուշ Հակոբյանը գտել է հնարը՝ կանանց տոն ունենալու համար։
Նա դիմել է աստվածաշնչյան կերպարների օգնությանը։ Ապրիլի 7-ին Հայ առաքելական եկեղեցին նշում է Մարիամ Աստվածածնի ավետման տոնը։ Պատգամավորը հենց այդ օրն էլ որոշել է հռչակել մայրության և գեղեցկության տոն։
Խորհրդարանը, սակայն, դեմ է եղել օրինագծին, և որպեսզի կանայք ու աղջիկները պաշտոնական տոն ունենան, Հրանուշ Հակոբյանը մի հետաքրքիր հնարամտության է դիմել։
Քանի որ ԱԺ նիստերը հեռարձակվում էին ուղիղ եթերով, նա օպերատորներին խնդրել է ցույց տալ լուսատախտակը, որտեղ երևում է, թե ով ինչպես է քվեարկել։
Հրանուշ Հակոբյանը ԱԺ ամբիոնից դիմել է պատգամավորների կանանց՝ հորդորելով հետևել քվեարկությանը, որպեսզի նրանց, ովքեր դեմ քվեարկեն նախագծին՝ կանայք տուն չթողնեն։
…Օրինագիծն ընդունվել է ձայների ճնշող մեծամասնությամբ։
