ԵՐԵՎԱՆ, 8 ապրիլի — Sputnik. Մի քանի տասնյակ ուսանող և աշակերտ Հայ-ռուսասկան (Սլավոնական) համալսարանում մասնակցեցին ռուսաց լեզվի «Տոտալ թելադրությանը»:
Թելադրությունն անցկացնող ՀՌՀ ռուսական բանահյուսության ինստիտուտի տնօրեն, բանասիրական գիտությունների թեկնածու, դոցենտ Արշակ Սարգսյանի խոսքով` նման ակցիայի անցկացումը «հզոր» գաղափար է, քանի որ վերջին տարիներին մարդիկ հետ են վարժվել ձեռագիր գրելու մշակույթից:
«Գնալով ավելի շատ մարդիկ, հատկապես՝ երիտասարդներ, էլեկտրոնային հաղորդագրություններ են գրում միմյանց, ընդ որում՝ տեքստերի մեծամասնությունն առանց կետադրական նշանների է: Ճիշտ գրավոր խոսքը, հաճախ, մոռացվում է: Սակայն ամեն ինչ հնարավոր է ուղղել, ցանկություն է հարկավոր»,- ասաց Սարգսյանը:
Նա հայտնեց, որ այս տարի մասնակիցներին կներկայացվի երեք թելադրություններից մեկը, որը նվիրված է Ռուսաստանի քաղաքներին ու գետերին: Սլավոնական համալսարանում անցկացվող «Տոտալ թելադրության» մասնակիցները լսեցին Ուլան Ուդե և այդ քաղաքի միջով հոսող Սելենգե գետի մասին: Ինչպես Sputnik Արմենիային հայտնեցին թելադրության մասնակիցները, նրանցից շատերը որոշեցին ուժերը փորձել առաջին հերթին հենց իրենց համար:
«Ուզում եմ փորձել ուժերս, չէ՞ որ սովորում եմ ՀՌՀ-ում: Շատ եմ լսել այս նախագծի մասին և որոշեցի պարզել, թե ինչ է դա»,- ասաց բանասիրության ֆակուլտետի երկրորդ կուրսի ուսանողուհի Ելենա Շահինյանը:
Մեկ այլ ուսանողուհի, որը նույնպես որոշել էր ստուգել գիտելիքը, կատակեց, թե՝ անունը կասի միայն թելադրությունը «գերազանց» հանձնելուց հետո: Ի դեպ, իրական անունն ու ազգանունը թելադրությունը հանձնելիս կարելի է չնշել: Իրենց ուժերը փորձելու էին եկել ոչ միայն ուսանողներ, դասախոսներ, այլև դպրոցի բարձր դասարանների աշակերտներ:
«Պատրաստվում եմ ընդունվել ՀՌՀ բանասիրության ֆակուլտետ, որոշեցի ստուգել ինձ»,- ասաց 11-րդ դասարանի աշակերտուհի Աննա Սիմոնյանը:
Նա խոստովանում է, որ, սովորաբար, մեկ կամ երկու կետադրական սխալ է անում թելադրության մեջ, իսկ սա գիտելիքը ստուգելու ևս մեկ հնարավորություն է: Թելադրություն գրողների շարքում էր նաև Հայաստանում Ռուսաստանի դեսպանատան մամուլի քարտուղար Վերոնիկա Արթենյանը:
«Ես եկա թելադրություն գրելու, քանի որ դպրոցում միշտ սիրել եմ ռուսաց լեզուն: Սիրով թելադրություններ էի գրում: Որոշեցի օգտվել հնարավորությունից, վերապրելո այդ զգացողությունները, երբ կարծում ես, որ գրագետ ես գրում, սակայն արդյունքում ցածր գնահատական ես ստանում»,- հիշում է Արթենյան:
Թելադրություն գրելուց հետո նա խոստովանեց Sputnik Արմենիային, որ, հավանաբար, այդ զգացողությունը կրկին կվերապրի: Թելադրությունն անցկացվեց նաև Պլեխանովի անվան ռուսական տնտեսագիտական համալսարանի Երևանյան մասնաճյուղում և Երևանի ադմիրալ Իսակովի անվան № 132 հիմնական դպրոցում:
Տոտալ թելադրությունն ամենամյա կրթական ակցիա է բոլոր ցանկացողների համար՝ կամավոր թելադրության սկզբունքով։ Կամավոր թելադրության գաղափարը ծնվել է 2000-ականների սկզբին Նովոսիբիրսկում՝ Նովոսիբիրսկի պետական համալսարանի հումանիտար ֆակուլտետի «Գլում-կլուբ» ուսանողական ակումբում։ Ակցիայի կազմակերպիչը «Տոտալ թելադրություն» լեզվային մշակույթի աջակցման հիմնադրամն է։
Ենթադրվում է, որ 2017 թվականին տոտալ թելադրությունը կանցկացվի Ռուսաստանի և նրա սահմաններից դուրս գտնվող մի քանի հարյուր քաղաքներում, իսկ տեքստը, որը թելադրության համար հատուկ ընտրել է ժամանակակից հայտնի ռուս գրող Լեոնիդ Յուզեֆովիչը, կգրի ավելի քան 200 հազար մարդ։
