ԵՐԵՎԱՆ, 7 ապրիլի — Sputnik. Մոսկվայի Բասմանյան դատարանը որոշել է կալանքի տակ առնել Տաջիկստանի քաղաքացի Սոլիկ Օրտիկովին, որը Սանկտ Պետերբուրգում իրականացված ահաբեկչության ութ կասկածյալներից մեկն է։ Այս մասին հայտնում է ՌԻԱ Նովոստին։
«Օրտիկովի նկատմամբ որպես խափանման միջոց կիրառել կալանքը»,- որոշումը հրապարակել է դատավոր Ելենա Լենսկայան։
Այսպիսով նա ընդունել է հետաքննության ներկայացրած փաստարկն այն մասին, որ եթե դատարանն ազատ արձակի Օրտիկովին, նա կարող է թաքնվել կամ կապ հաստատել ահաբեկչության մյուս մասնակիցների հետ, որոնց ինքնությունը դեռ չի հաստատվել։
Ապրիլի 3-ին Սանկտ Պետերբուրգի մետրոյում պայթյուն էր որոտացել, 14 մարդ զոհվել է, մի քանի տասնյակը` տարբեր աստիճանի վնասվածքներ ստացել։ Տուժածների թվում կան նաև երեխաներ։ Պայթյունը տեղի է ունեցել Սանկտ Պետերբուրգի մետրոյի «Տեխնոլոգիական ինստիտուտ» և «Սենայի հրապարակ» կայարանների մոտ։ Հարուցված է քրեական գործ «Ահաբեկչություն» հոդվածով, սակայն հետաքննությունը դիտարկում է նաև այլ տարբերակներ։
