ԵՐԵՎԱՆ, 7 ապրիլի — Sputnik. Այսօր «Զվարթնոց» օդանավակայանում կանանց ու աղջիկներին դիմավորում են վարդերով. Երևանի քաղաքապետարանի անակնկալն է Մայրության և գեղեցկության տոնի առթիվ։
Sputnik Արմենիայի թղթակիցներն ականատես են եղել, թե ինչպես են կանայք արձագանքում այդ անակնկալին։
«Շատ ուրախ եմ, որ այսօր հայրենիք եմ վերադարձել, և անչափ հաճելի է, երբ այսպես են դիմավորում։ Պատրաստվում ենք ամբողջ ընտանիքով նշել Մայրության և գեղեցկության տոնը»,- ասաց Ռուսաստանից ժամանած Աննա Խուդոյանը` ավելացնելով, որ Հայաստանում ապրիլի 7-ն ավելի մեծ շուքով է նշվում, քան Մարտի 8-ը։
Ռուս զբոսաշրջիկները չգիտեին, թե ինչու են իրենց ծաղիկ նվիրում, բայց անկեղծ ուրախացել էին անակնկալից։
«Մենք առաջին անգամ ենք Հայաստանում։ Անչափ շնորհակալ ենք, շատ հաճելի էր»,- ասաց ռուս կանանցից մեկը։
Իսկ երբ իմացան, թե ինչու են ծաղիկներ ստացել, որոշեցին, որ անպայման կմիանան տոնին և իրենք էլ կնշեն։
Վերջին տարիներին ձևավորված բարի ավանդույթի համաձայն՝ Երևանի քաղաքապետարանը Մայրության և գեղեցկության տոնի՝ ապրիլի 7-ի առթիվ հաճելի անակնկալներ պատրաստում մայրաքաղաքի կանանց, աղջիկների և այդ օրը Երևանում գտնվող իգական սեռի զբոսաշրջիկների համար:
Անակնակալները չեն դադարում ամբողջ օրվա ընթացքում։ Ապրիլի 7-ին մինչև ուշ գիշեր տարբեր միջոցառումներ են կազմակերպվում մայրաքաղաքի տարբեր հատվածներում։
