ԵՐԵՎԱՆ, 6 ապրիլի — Sputnik. 2017 թվականի հունվարին 2016 թվականի դեկտեմբերի համեմատ սպառողական շուկայում մեծ գնաճ է արձանագրվել` 2,6%, իսկ փետրվարին մարտի համեմատ գնանկում` 0,9% և 0,3%։ Ընդհանուր առմամբ, անցյալ տարվա դեկտեմբերի համեմատ այս տարվա փետրվար-մարտ ամիսներին սպառողական շուկայում գնանկումը կազմել է 1,2%։
Այդ մասին հայտնել է Հայաստանի ազգային վիճակագրական ծառայության նախագահի խորհրդական Գուրգեն Մարտիրոսյանը։
Նրա խոսքով` Հայաստանը, վիճակագրական տվյալների համաձայն, փակել է 2016 թվականը 1,4% գնանկումով։ Հայաստանում սպառողական գները 2017 թվականի հունվար-մարտ ամիսներին անցյալ տարվա նույն ժամանակահատվածի համեմատ նվազել են 0,3%-ով։
«2017 թվականի առաջին եռամսյակում մենք շաքարի և շաքարավազի գնաճ ենք արձանագրել. հունվարին` 0,6%, փետրվարին` 0,4%, մարտին` 0,1%։ Երեք ամիսների ընթացքում գնաճը կազմել է 1,1%։ Ծխախոտը նույնպես թանկացել է. հունվարին՝ 0,1%, փետրվարին` 0,1%, մարտին` 0,5%, ընդհանուր առմամբ, երեք ամիսների ընթացքում` 0,7%», — նշել է Մարտիրոսյանը։
Ալյուրը, նրա խոսքով, նույնպես թանկացել է։ Հունվարին գինն աճել է 0,3%, փետրվարին` 1,3%, մարտին գինն ընկել է 0,7%։
Ինչպես նշեց Մարտիրոսյանը, 2017 թվականի մարտին անցյալ տարվա նույն ժամանակահատվածի համեմատ ձկնեղենի գնաճը կազմել է 15,7%։
Ազգային վիճակագրական տվյալների համաձայն` 2017 թվականի մարտին գները անցյալ տարվա մարտի համեմատ աճել են 23,8%, փետրվարի համեմատ 2%։ Մասնավորապես, բանանը մարտին թանկացել է 5,8%՝ անցյալ ամսվա համեմատ, սակայն անցյալ տարվա նույն ժամանակահատվածի համեմատ էժանացել է 8,7%։
Մարտիրոսյանը նաև ավելացրեց, որ 2017 թվականի մարտին մսամթերքի գինը, անցյալ տարվա մարտի համեմատ, անփոփոխ է մնացել, իսկ 2017 թվականի փետրվարի համեմատ աճել է 0,6%-ով։ Ընդ որում, կաթնամթերքի, պանրի և ձվի գները 2017 թվականի մարտին 2016 թվականի մարտի համեմատ նվազել են 3%, իսկ 2017 թվականի փետրվարի համեմատ` 0,2%-ով։
Իսկ 2017 թվականի մարտին բանջարեղենի գինը փետրվարի համեմատ նվազել է 7,1%-ով։
2017 թվականի առաջին եռամսյակում անցյալ տարվա նույն ժամանակահատվածի համեմատ ոգելից խմիչքի գներն աճել են 1,7%։
2017 թվականի առաջին եռամսյակում վառելիքի գնաճ է նկատվել։ Մասնավորապես` բենզինի գինը նվազել է 3,3%, իսկ փետրվարին աճել է 9,2%, մարտին 2,5%։
Եթե համեմատենք անցյալ տարվա մարտի հետ, բենզինի գինը 2,4%-ով ցածր է։
