ԵՐԵՎԱՆ, 5 ապրիլի — Sputnik. Քննությունը պարզել է ապրիլի 3-ին Սանկտ Պետերբուրգում մետրոյի կայարանում տեղի ունեցած պայթյունի զոհերի ինքնությունը։ Այս մասին հայտնել է ՌԴ ՔԿ պաշտոնական ներկայացուցիչ Սվետլանա Պետրենկոն։
Նրա խոսքով` վերջին զոհի` Մարիա Նևներժիցկայայի ինքնությունը նույնպես պարզվել է։
«Այսօր նաև իրականացվել է Յուլիա Կրասիկովայի և Դմիտրի Մազանովի ինքնության ճանաչման գործընթացը»,- ասել է Պետրենկոն` ավելացնելով, որ զոհերի դիերն ընտանիքներին հանձնելու գործընթացը շարունակվում է։
Ապրիլի 3-ին Սանկտ Պետերբուրգի մետրոյում պայթյուն էր որոտացել, 14 մարդ զոհվել է, տուժածներից 49-ը դեռ հիվանդանոցներում են։ Տուժածների թվում կան նաև երեխաներ։ Պայթյունը տեղի է ունեցել Սանկտ Պետերբուրգի մետրոյի «Տեխնոլոգիական ինստիտուտ» և «Սենայի հրապարակ» կայարանների մոտ։ Հարուցված է քրեական գործ «Ահաբեկչություն» հոդվածով, սակայն հետաքննությունը դիտարկում է նաև այլ տարբերակներ։ Ապրիլի 4-ից Սանկտ Պետերբուրգում եռօրյա սուգ է հայտարարվել։
