Սանկտ Պետերբուրգում ձերբակալել են ծնունդով Միջին Ասիայից վեց հոգու՝ ահաբեկչական ուղղվածության հանցագործություններ կատարելու համար քաղաքացիների հավաքագրման կասկածանքով, բայց հետաքննությունը տվյալներ չունի, որ նրանք կապված են այն ահաբեկչի հետ, որը պայթյուն Է իրականացրել մետրոյում: Այս մասին ՌԻԱ Նովոստիին են հայտնել ՌԴ-ի Քննչական կոմիտեի մամուլի ծառայությունից:
«2017 թվականի ապրիլի 5-ին Ռուսաստանի անվտանգության համապետական ծառայության, ՆԳ նախարարության աշխատակիցների եւ Ռոսգվարդիայի հատուկ ստորաբաժանումների հետ համատեղ քննիչների կողմից քննչական գործողությունների եւ օպերատիվ-որոնողական միջոցառումների անցկացման արդյունքում ձերբակալվել է վեց քաղաքացի Միջին Ասիայի հանրապետություններից, որոնք Ռուսաստան են ժամանել փող վաստակելու»,- հայտնել են Քննչական կոմիտեից:
Հետաքննության վարկածով՝ նրանք 2015 թվականի նոյեմբերից Սանկտ Պետերբուրգում իրականացրել են առավելապես Միջին Ասիայի հանրապետություններից սերածների հավաքագրում՝ ահաբեկչական ուղղվածության հանցագործություններ կատարելու եւ Ռուսաստանում արգելված «Ջեբհաթ ան Նուսրա» եւ «Իսլամական պետություն» ահաբեկչական կազմակերպությունների գործունեության մեջ ներգրավելու համար:
Ապրիլի 3-ին Սանկտ Պետերբուրգի մետրոյում պայթյուն էր որոտացել, 14 մարդ զոհվել է, տուժածներից 49–ը դեռ հիվանդանոցներում են։ Տուժածների թվում կան նաև երեխաներ։ Պայթյունը տեղի է ունեցել Սանկտ Պետերբուրգի մետրոյի «Տեխնոլոգիական ինստիտուտ» և «Սենայի հրապարակ» կայարանների մոտ։ Հարուցված է քրեական գործ «Ահաբեկչություն» հոդվածով, սակայն հետաքննությունը դիտարկում է նաև այլ տարբերակներ։ Ապրիլի 4-ից Սանկտ Պետերբուրգում եռօրյա սուգ է հայտարարվել։
