ԵՐԵՎԱՆ, 5 ապրիլի — Sputnik. Նախնական տվյալների համաձայն՝ երեք հայ համալրել են Գլենդելի քաղաքային խորհրդի կազմը, գրում է Glendale News Press-ը։
Պարբերականի տվյալներով` Վրեժ Աղաջանյանը, Արա Ջեյմս Նաջարյանն ու Զարե Սինանյանը։ Ընտրությունների վերջնական արդյունքները կհրապարակվեն ապրիլի 21-ին։
Ընդհանուր առմամբ, թափուր տեղերի համար պայքարում է 10 թեկնածու, այդ թվում չորս հայ՝ վերը նշվածներն ու Օնիկ Մեհրաբյանը։
Աղաջանյանը մասնագիտությամբ ինժեներ է։ Նա հայտնի է հայկական արբանյակային հեռուստաալիքի իր քաղաքական թոկ-շոուներով։ Աղաջանյանը քաղաքային խորհրդի շարքերը համալրելու պարագայում մտադիր է ապահովել խորհրդի աշխատանքի թափանցիկությունն ու աջակցել փոքր բիզնեսին։
Գլենդելի նախկին քաղաքապետ Արա Նաջարյանը խոստանում է զարգացնել քաղաքի կենտրոնն ու ընդլայնել հասարակական տրանսպորտը։ Զարե Սինանյանի համար սա երկրորդ ժամկետն է լինելու քաղաքային խորհրդի անդամի պաշտոնում։ Նախկինում նա զբաղեցնում էր քաղաքապետի պաշտոնը, իսկ այժմ շեշտը դնում է քաղաքի կենտրոնում բազմաֆունկցիոնալ համալիրում նախատեսվող ոչ թանկ բնակարաններ տրամադրելու վրա։ Գլենդելը համարվում է ԱՄՆ-ի ամենամեծ հայ համայնքը ունեցող քաղաքը, որի բնակչության 50%-ը հայեր են։
