ԵՐԵՎԱՆ, 5 ապրիլի — Sputnik. Գրող, հրապարակախոս Մերուժան Տեր-Գուլանյանին խորհրդարանական ընտրությունների արդյունքները չեն զարմացրել:
«Այն, ինչ տեղի ունեցավ, սպասելի էր: Ես այդպես էլ գիտեի, որովհետև ես շփվող մարդ եմ, մարդկանց հետ շատ եմ շփվում, սրճարաններում և այլն: Խմբագիր եմ, եկող-գնացող շատ է լինում: Այդպես էլ պետք է լիներ»,- այսօր լրագրողների հետ հանդիպման ժամանակ, անդրադառնալով ընտրությունների արդյունքներին, ասաց Տեր-Գուլանյանը:
Անսպասելի է եղել միայն այն, որ «Ելք» դաշինքը քվեների թվով առաջ է անցել ՀՅԴ-ից: Տխրեցրել է այն, որ Բագրատյանը, Սեյրան Օհանյանն ու էլի մի քանի թեկնածուներ չեն լինի ԱԺ-ում: Բայց Մերուժան Տեր-Գուլանյանը դրանում մեղադրում է հենց նրանց՝ վատ քարոզարշավ իրականացնելու համար:
Փոխարենը գրողին հիացրել է ՀՀԿ–ի քարոզարշավը: «Հիացած եմ Կարեն Կարապետյանի քարոզչական ընդունակություններով»,- ժողովուրդը սիրեց մեր վարչապետին, նրա լավատես ու հետաքրքիր կերպարը, ժողովրդի հետ ժողովրդի լեզվով խոսելու, ոչ մի սուտ բան չխոստանալու դրվածքը»,- ասաց նա:
Վարչապետի նկատմամբ վերաբերմունքը, Տեր-Գուլանյանի համոզմամբ, արտահայտում է նաև վերաբերմունքը կառավարության նկատմամբ: Ուստի գրողը համոզված է՝ այս ընտրություններից հետո արտագաղթը ոչ միայն չի ավելանա, այլև կդադարի:
Ռեժիսոր Նիկոլայ Ծատուրյանը ևս սպասում էր ընտրությունների նման արդյունքի, դրա համար էլ, ինչպես նշեց նա, ընտրության չի գնացել: Ավելին` վստահ է, որ ընտրության արդյունքը պայմանավորված է եղել ընտրակաշառքներով: Քարոզարշավի առաջին օրվանից անհամբեր սպասել է ապրիլի 3-ին, որ ամեն ինչ շուտ ավարտվի, թոհուբոհը դադարի: Ի տարբերություն Մերուժան Տեր-Գուլանյանի լավատեսության, Նիկոլայ Ծատուրյանը կարծում է, որ Կարեն Կարապետյանի կառավարությունն էլ ի զորու չի լինելու դադարեցնել արտագաղթը:
