ԵՐԵՎԱՆ, 5 ապրիլի — Sputnik. Ռուսաստանում Հայաստանի արտակարգ և լիազոր դեսպան Վարդան Տողանյանը Մոսկվայում, «Վրեմենա գոդա» կինոթատրոնում մասնակցել է «Խոստում» ֆիլմի փակ ցուցադրությանը։ Նա դիմել է հանդիսատեսին՝ կոչ անելով Հայոց ցեղասպանության հարցի շուրջ աշխատանքներ տանել։
Նրա կարծիքով, պետք է կառուցել աշխատանքի այնպիսի համակարգ, որում տեղեկատվական, մշակութային բաղադրիչն ավելի մեծ դեր խաղա։
«Դա ավելի կարևոր է, քան Թուրքիայի դեսպանատան դիմաց կազմակերպվող ցույցերը», — ասել է Տողանյանը՝ նշելով, որ ֆիլմի փակ ցուցադրության նպատակն է հայրենակիցների, ընկերների, գործընկերների, փորձագետների ուշադրությունը սևեռել այս նախագծին։
Դեսպանը բոլորին խնդրել է աջակցել, որպեսզի ֆիլմն ավելի լայն հարթակներում ներկայացվի։
«Խոստում» ֆիլմը ստեղծվել է ամերիկահայ միլիարդատեր Քըրք Քըրքորյանի ֆինանսական աջակցությամբ։ Ֆիլմի հեղինակը «Հյուրանոց «Ռուանդա»» ֆիլմի ռեժիսոր Թերի Ջորջն է, գլխավոր դերերում հանդես են եկել Օսկար Այզեքը, Քրիստիան Բեյլը և Շարլոտ լե Բոնը։
Գործողությունները զարգանում են Օսմանյան կայսրությունում իրականացված Հայոց ցեղասպանության ժամանակ։ Ֆիլմի պրեմիերան տեղի կունենա ապրիլի 21-ին։ Ֆիլմի մասին հիացմունքով են խոսել համաշխարհային ճանաչում ունեցող երգիչներ ու դերասաններ, մասնավորապես` Շերը, Էլթոն Ջոնը, Բարբարա Սթրեյզանդը, Սերժ Թանկյանը և այլն։ Լեգենդար դերասան Սիլվեստր Ստալոնեն ֆիլմի մասին գրել է Instagran-ում՝ նշելով, որ ֆիլմն ունի անհրաժեշտ բոլոր հատկանիշները «Օսկար» ստանալու համար։
