ԵՐԵՎԱՆ, 5 ապրիլ — Sputnik. Համաշխարհային ճանաչում ունեցող երգիչ Շառլ Ազնավուրը ռուսական Առաջին ալիքի եթերում, «Երեկոյան Ուրգանտ» հաղորդման շրջանակում պատմել է իր ընտանիքի, Հոլիվուդում իր անունով բացված աստղի ու Հայաստանին օգնող բարեգործական հիմնադրամի մասին։
«Երջանիկ եմ, որ այստեղ եմ, քանի որ սա իմ հարազատների երկիրն է։ Հայրս միշտ մտերիմ է եղել ռուսների հետը, և մենք մեծացել ենք ռուսական երաժշտության ներքո»,- ասել է երգիչը։
Հոլիվուդում Ազնավուրի անվան աստղ է բացվել, Ուրգանտի այն հարցին, թե ինչ է նշանակում երգչի համար այդ աստղը, Ազնավուրը պատասխանել է` «երբ ինձ ինչ-որ բան տալիս են, ես վերցնում եմ»։
«Սկզբում Ֆրանսիայում իմ մասին միայն վատն էին խոսում, և հիմա վրեժ լուծելու համար ես ընդունում եմ այն ամենը, ինչ ինձ տալիս են։ Հրաշալի վրեժ է»,- ասաց Ազնավուրը։
Նա նշել է, որ Կրեմլում կայանալիք համերգի տոմսերի վաճառքից ստացված գումարները կփոխանցվեն «Ազնավուրը Հայաստանի համար» հիմնադրամին։
«Հայաստանն օգնության կարիք ունի։ Մի փոքրիկ երկիր է, որը շրջապատված է այնպիսի երկրներով, որոնցից մի մասը բարեկամներ են, մյուսները ` թշնամիներ։ Ես ուզում եմ, որ բոլորը բարեկամներ լինեն։ Բայց դրա համար պետք է, որ նրանք էլ այնպիսի մենթալիտետ ունեն, ինչպիսին մերն է։ Սա հողի ու նավթի հարց չէ, այլ` մարդ լինելու։ Կարևորն այն է, որ մարդը մարդ մնա»,– ասել է նա։
