ԵՐԵՎԱՆ, 4 ապրիլի — Sputnik. Ֆրանսիայի Ալֆորվիլ քաղաքում անհայտ անձինք փորձել են հրդեհել Հայ առաքելական եկեղեցու շենքը: Այս մասին տեղեկացնում է հայկական Armenian Weekly կայքը:
Կայքը հայտնում է, որ չարագործներն ապրիլի 2-ի վաղ առավոտյան այրել են եկեղեցու հարևանությամբ գտնվող աղբամանները, որտեղից կրակը հասել է եկեղեցու մուտքին: Եկեղեցու հոգևոր հովիվ Ժիլբեր Լևոնյանն ու նրա կինը, որոնք բնակվում են շենքի առաջին հարկում, չեն տուժել:
Դեպքի վայր հասած հրշեջներին հաջողվել է կանխել կրակի տարածումը:
Ալֆորվիլի քաղաքապետ Լյուկ Կարվունասը դատապարտել է հարձակումը:
Կայքը նշում է, որ միջադեպը տարվա ընթացքում գրանցված արդեն երրորդ դեպքն է: Մի քանի օր առաջ էլ անհայտ անձինք քարեր էին նետել եկեղեցու ուղղությամբ:
