ԵՐԵՎԱՆ, 4 ապրիլի — Sputnik. Եվրասիական տնտեսական միությանն անդամակցելուց հետո Հայաստանն ու Ղրղըզստանը տնտեսական ամենամեծ աճն են արձանագրել, երեքշաբթի Դուշանբեում տեղի ունեցած «Նոր հնարավորությունների տնտեսություն։ Եվրասիական ինտեգրման նախագծի երկրների հետ Տաջիկստանի համագործակցության հեռանկարները» թեմայով միջազգային կլոր սեղանի ընթացքում հայտնել է ԵԱՏՄ զարգացման և ինտեգրման դեպարտամենտի ղեկավար Սերգեյ Շուխնոն։
«Հենքային նվազագույն ներուժով ԵԱՏՄ անդամ դարձած Ղրղըզստանն ու Հայաստանը կազմակերպության շարքերը համալրելուց հետո տնտեսության «պայթյունային» աճ ցուցադրեցին»,- ասել է նա։
Շուխնոն նշել է, որ մեծ առաջընթաց է նկատվում այդ երկրներում այնպիսի կարևոր ոլորտներում, ինչպիսիք գյուղատնտեսությունն ու թեթև արդյունաբերությունն են։
«Տաջիկստանի տնտեսության համար նրա ներկա վիճակում արտաքին ներդրումների հարցը առաջնային է»,- ավելացրեց նա։
Շուխնոն համոզմունք հայտնեց, որ ԵԱՏՄ-ին Տաջիկստանի անդամակցությունը կբարելավի ազգային տնտեսության վիճակը և կբարձրացնի երկրի բնակչության բարեկեցությունն ընդհանուր առմամբ։
ԵԱՏՄ անդամ պետություններն են Հայաստանը, Բելառուսը, Ղազախստանը, Ռուսաստանը, անցյալ տարվա մայիսի 21-ին ԵԱՏՄ-ին միացավ նաև Ղրղըզստանը, իսկ մայիսի 25-ին Վիետնամը միության երկրների հետ ազատ առևտրի գոտի մտավ։
