ԵՐԵՎԱՆ, 3 ապրիլի — Sputnik. Սանկտ Պետերբուրգի մետրոյում տեղի ունեցած պայթյունից մի քանի ժամ անց Հայաստանի հյուպատոսության շենքի մոտ սովորական իրավիճակ է: Մեր հայրենակիցներից մեկը՝ Սանկտ Պետերբուրգի բնակիչ Եվգենի Մարգարյանն ապրում է հյուպատասարանի մոտ և ասում է, որ մարդկանց կուտակումներ չկան:
«Ես հիմա պատուհանի մոտ եմ: Շենքի մուտքի դիմաց ոչ ոք չկա: Միայն հյուպատոսարանի մեքենան է, ու վերջ»,- ասաց Մարգարյանը:
Նրա խոսքով՝ քաղաքային հեռուստաընկերություններից երկուսը հաղորդել են, որ տուժածների թվում նաև հայեր կան:
«Ինձ զարմացրեց, որ զոհերի քանակի վերաբերյալ հստակ տեղեկություն դեռ չկա, բայց նշվում է տուժածների ազգային պատկանելությունը: Այդ հանգամանքը ոչ միայն զարմացրեց ինձ, այլև անհանգստացրեց»,- ասաց նա:
Մարգարյանը հայտնեց նաև, որ հայկական ազգանուններ չեն նշվում, բայց ՀՀ արտգործնախարարությունը և Հայաստանի հյուպատոսարանը տեղեկություն են հրապարակել այն մասին, որ տուժածների մեջ հայեր կան:
