ԵՐԵՎԱՆ, 3 ապրիլի — Sputnik. Հայաստանի վարչապետ Կարեն Կարապետյանը «Իզվեստիա» թերթին տված հարցազրույցում խոստովանել է` ձգտում է այնպես կազմակերպել աշխատանքը, որ իրենց բարեփոխիչ անվանի ոչ միայն նախագահը։
«Ինչ վերաբերում է ինձ` որպես վարչապետի, ասեմ` եթե ինձ վստահվել է այս պաշտոնը, ուժերիս ներածին չափ կանեմ հնարավորը մեր երկրի վերականգնմանը նպաստելու համար, որպեսզի Հայաստանը լինի ժամանակակից, առաջ շարժվող և զարգացած երկիր», — ասել է Կարապետյանը։
Նրա խոսքով` երբ Հայաստանի նախագահը հրաման ստորագրեց վարչապետի պաշտոնում նշանակելու մասին, իր ուսերին դրվեց երկրում փոփոխություններ կատարելու պատասխանատվությունը։
Ըստ վարչապետի`բարեփոխումը հիմնականում փոփոխությունն է դեպի լավը, իսկ փոփոխությունը մեր ամենօրյա անհրաժեշտությունն է։
«Երբեք չի լինի այնքան կատարյալ կառավարման համակարգ, որը փոփոխությունների կարիք չունենա։ Ես ձգտում եմ այնպես կազմակերպել մեր աշխատանքը, որ ինձ բարեփոխիչ անվանի ոչ միայն նախագահը», — ընդգծել է վարչապետը։