ԵՐԵՎԱՆ, 2 ապրիլի — Sputnik. «Խոստումը» «Օսկարի» ներկայացնելու ֆիլմ է. այս մասին Instagram-ի իր էջում գրել է հոլիվուդյան աստղ Սիլվեստեր Ստալոնեն։
«Այս յուրօրինակ ֆիլմը կսկսի ցուցադրվել ապրիլի 21-ին… Սա մի թեմա է, որով հիացած եմ տասնամյակներ ի վեր, և շատ տարիներ էին պետք այն էկրաններ բարձրանալու համար: Սա ճշմարիտ և անհավատալի կարևոր պատմական դրամա է, որն ունի բոլոր յուրօրինակ բաղադրիչները, ինչը կարող է ֆիլմը դարձնել «Օսկարի» մակարդակի»,- գրել է Ստալոնեն:
Դերասանի խոսքով` Քրիստիան Բեյլը և Օսկար Այզեքն իրենց դերերը կատարյալ են խաղում:
«Ֆիլմն ուներ ամեն բան… Ես խանդում եմ»,- գրել է Ստալոնեն:
Քըրք Քըրքորյանի հովանավորությամբ նկարահանված ֆիլմի ստեղծման գործում պրոֆեսիոնալ թիմ է աշխատել։ Ֆիլմի ռեժիսոր օսկարակիր Թերի Ջորջը ընտրել է տաղանդավոր և իրենց գործում հմուտ դերասանների՝ Քրիստիան Բեյլ, Օսկար Այզեկ, Շառլոտա Լե Բոն, Անժելա Սարաֆյան, Ջեյմս Քրոմվել և ուրիշներ, իսկ կինոնկարի սաունդթրեքը գրել է աշխարհահռչակ հայ երաժիշտ Սերժ Թանկյանը։
Ֆիլմի հիմքում սիրո պատմություն է, որի դեպքերը զարգանում են Հայոց ցեղասպանության տարիներին։ Նշենք, որ «Խոստում» ֆիլմի պրեմիերան Հայաստանում նախատեսված է ապրիլի 27-ին:
