ԵՐԵՎԱՆ, 2 ապրիլի — Sputnik. Կանադայից Հայաստան ժամանած դերասանուհի Արսինե Խանջյանը, որպես անկախ դիտորդ, Գորիսի ընտրատարածքում է։
Խանջյանը ժամանակ առ ժամանակ տեսանյութեր է հրապարակում «Ֆեյսբուք» սոցիալական ցանցում։
«Գորիսի երեք տեղամասերում ընտրությունների ընթացքը վերահսկելիս ակնհայտ դարձավ, որ բազմաթիվ քաղաքացիներ ծանոթ չեն քվեարկության կարգին, թերթիկների թիվը շփոթմունք է առաջացնում, շատ էին բաց քվեարկության դեպքերը»,- գրել է Խանջյանը։
Բերքաբեր գյուղում Խանջյանը մեկ այլ խախտում է արձանագրել։
«Դիտորդները նկատեցին, որ նետված քվեաթերթիկների պարկը դրված չէր տեսանելի վայրում։ Նախագահը, հաշվի առնելով նկատառությունը, պարկը տեղադրեց օրենքով սահմանված տարածքում»,- գրել է նա։
Դերասանուհին հայտնել է նաև, որ երկու մարդ միաժամանակ քվեարկել են նույն քվեախցում։
