ԵՐԵՎԱՆ, 1 ապրիլի — Sputnik. Այսօր Հայաստանում ապրում է աուտիզմ ախտորոշումը կրող 1000-ից ավելի երեխա. Sputnik Արմենիա մամուլի կենտրոնում կայացած ասուլիսի ժամանակ այսպիսի եզրակացությամբ հանդես եկավ «Աուտիզմի հաղթահարում» ՀԿ հիմնադիր տնօրեն, «Աուտիզմ» ազգային հիմնադրամի հոգաբարձուների խորհրդի անդամ Հասմիկ Մարգարյանը։
«Ամեն տարի ախտորոշման գրանցման աճ է արձանագրվում։ Աուտիզմն ավելի տարածված է, քան մանկական շաքարային դիաբետը, ուղեղային կաթվածը և մանկական օնկոլոգիական հիվանդությունները»,- ասաց Մարգարյանը:
«Աուտիզմ» ազգային հիմնադրամ բարեգործական հասարակական կազմակերպության դեռահասների մասնագիտական ծրագրերի համակարգող Ինեսսա Հարությունյանը նշեց, որ հենց այն տարիքում, երբ արդեն երեխան փորձում է տեսողական շփման միջոցով կապ հաստատել ծնողի հետ, այդ ընթացքում արդեն մասնագետները և ուշադիր ծնողները միանգամայն կարող են նկատել հատկանշական առանձնահատկություններ, որոնք սովորական չեն, օրինակ` ՝ անվանը չարձագանքելը, շրջապատող միջավայրով չհետաքրքրվելը, խոսքի բացակայությունը կամ ոչ ֆունկցիոնալ լինելը, մանկական խաղերում հասակակիցներից տարբերվելը և այլն։
Հայաստանում աուտիզմ հիվանդությունը կրողների մասին խոսելիս նշվեց նաև այն կարևոր հանգամանքը, որ ներկայացված թվերը միայն պաշտոնական են, մինչդեռ տվյալ ախտորոշման դեպքում վստահորեն կարելի է ասել, որ չգրանցված դեպքերը բազմաթիվ են, քանի որ շատ ծնողները չեն գրանցում նման ախտորոշում ունեցող երեխաներին:
Ըստ Ինեսսա Հարությունյանի՝ աուտիզմը դարի խնդիր է: Նա ուշադրություն հրավիրեց այն փաստին, որ աուտիզմը հիվանդին ուղեկցում է ամբողջ կյանքի ընթացքում, այդ պատճառով էլ անհրաժեշտ է համալիր մոտեցում ցուցաբերել:
«Մեր գլխավոր նպատակն է հասարակությանը իրազեկված պահել, ինչն էլ թույլ կտա ախտորոշումն ունեցող մարդկանց լիարժեք ինտեգրվել, ներգրավվել հասարակության տարբեր ոլորտներում»:
ՄԱԿ-ի գլխավոր ասամբլեան ապրիլի 2-ը հռչակել է Աուտիզմի իրազեկման համաշխարհային օր:
Աուտիզմը հոգեբանական օտարացման ծայրահեղ ձև է, որն արտահայտվում է շրջապատող իրականության հետ երեխայի հաղորդակցման խախտուներով և սեփական ապրումների մեջ խորասուզվածությամբ: ՄԱԿ-ի տվյալով՝ 68 երեխայից մեկն այսօր ունի աուտիզմ ախտորոշում:
