ԵՐԵՎԱՆ, 30 մարտի — Sputnik. Կենսաթոշակների չափն ավելացնելու համար պետք է բարձրացնել հարկերը կամ բարձրացնել կենսաթոշակային տարիքը: Այս երկու տարբերակն էլ կառավարության համար անընդունելի է: Sputnik Արմենիային տված բացառիկ հարցազրույցում, անդրադառնալով կենսաթոշակների չափերն ավելացնելու հասարակական պահանջին, ասաց Աշխատանքի և սոցիալական հարցերի նախարար Արտեմ Ասատրյանը:
«Կենսաթոշակի ավելացումը, յուրաքանչյուր 1000 դրամով, արժե շուրջ 5.5 մլրդ դրամ: Հետո, երբ խոսք է գնում կենսաթոշակի չափը բարձրացնելու մասին, չպիտի միայն խոսենք աշխատանքային կենսաթոշակների մասին, մենք ունենք նաև սոցիալական կենսաթոշակներ, ունենք նաև զինծառայության կենսաթոշակներ, պիտի համամասնորեն կարողանանք բարձրացնել նաև այս կենսաթոշակները, որպեսզի դիսբալանս չառաջանա դրանց միջև: Իսկ սա արդեն կարժենա ոչ թե 140 մլրդ դրամ, այլ շատ ավելին»,- ասաց նախարարը:
Թոշակներն ավելացնելու համար, Արտեմ Ասատրյանի խոսքով, նախ հարկ է ավելացնել տնտեսական արդյունքը:
2017թ-ի բյուջեյով Աշխատանքի և սոցիալական հարցերի նախարարությանը հատկացված 366 մլրդ դրամից 251 մլրդ-ը ուղղվում է կենսաթոշակների տրամադրմանը: Պաշտոնական վիճակագրության համաձայն` 1 աշխատողն այսօր իր վճարած հարկերով պահում է 1 կենսաթոշակառուի:
ՀՀ աշխատանքի և սոցիալական հարցերի նախարար Արտեմ Ասատրյանի հետ հարցազրույցի ամբողջական տարբերակը կարող եք ընթերցել և դիտել Sputnik Արմենիա տեղեկատվական գործակալության կայքում։
