ԵՐԵՎԱՆ, 30 մարտի — Sputnik. Հայաստանի Հանրապետության վարչապետ Կարեն Կարապետյանը կարևորում է ռուսաստանցի զբոսաշրջիկների ներգրավումը մեր երկիր:
«Կարծում եմ՝ Հայաստանը զբոսաշրջային առումով թերագնահատված է։ Նաև այնպիսի երկրի կողմից, ինչպիսին Ռուսաստանն է, որի համար մենք շատ ավելի «հասկանալի» ենք, քան մյուս երկրները», — Ծաղկաձորում ռուս զբոսաշրջիկների հետ հանդիպման ժամանակ ասաց Կարապետյանը։
Ըստ նրա՝ իշխանություններն այդ հարցի վերաբերյալ կոնկրետ ծրագիր ունեն, նախանշված են բոլոր այն շուկաները, որոնց ուղղությամբ նրանք աշխատելու են։
«Բնականաբար, Ռուսաստանը, որպես պոտենցիալ շուկա, մեզ համար առաջինն է», — ասաց Կարապետյանը։
2017 թվականի փետրվարի 23-ից Ռուսաստանի քաղաքացիները կարող են Հայաստան գալ ներքին անձնագրերով։ ՔԱԳՎ-ի տվյալներով՝ մեկ ամսվա ընթացքում ներքին անձնագրերով Հայաստան է ժամանել 3091 ռուսաստանցի։
