ԵՐԵՎԱՆ, 30 մարտի — Sputnik. Եվրասիական տնտեսական միությանն անդամակցելը ձեռնտու է Հայաստանի համար, ռուս լրագրողների հետ հանդիպման ժամանակ ասաց Հայաստանի վարչապետ Կարեն Կարապետյանը։
«Հայաստանին ձեռնտու է, որովհետև մեր շուկան ընդարձակվելու լայն հնարավորություն է ստացել», — ասաց Կարապետյանը։
Ինչ վերաբերվում է ՀՀ նոր Սահմանադրությանը, վարչապետի կարծիքով, այն չի խանգարի ԵԱՏՄ մասնակցության արդյունավետությանը։
«Խորհրդարանական կառավարման ձևը չի նշանակում, որ այն պակաս արդյունավետ է, քան նախագահականը», — ասաց Կարապետյանը։
ԵԱՏՄ-ն միջազգային ինտեգրացիոն տնտեսական միավորում է, որը ստեղծվել է Մաքսային միության և Միասնական տնտեսական տարածքի հիման վրա, գործում է 2015 թվականի հունվարի 1-ից։ ԵԱՏՄ անդամ երկրներն են Ռուսաստանը, Հայաստանը, Բելառուսը, Ղազախստանը և Ղրղըզստանը։
Հայաստանի վարչապետ Կարեն Կարապետյանը լրագրողներին հայտնեց, որ երբ Հայաստանը վերջնականապես անցնի խորհրդարանական կառավարման ձևին, ԵԱՏՄ-ում երկիրը կներկայացնի վարչապետը։
«Արդյոք վարչապե՞տը կներկայացնի երկիրը։ Կարծում եմ, իհարկե, վարչապետը կներկայացնի երկիրը», — ասաց Կարապետյանը` պատասխանելով լրագրողի հարցին։
