ԵՐԵՎԱՆ, 30 մարտի — Sputnik. ՀՀԿ-ն խորհրդարանական ընտրություններում հաղթելու դեպքում մոտավորապես 840 միլիոն դոլար ներդրում կներգրավի, լրագրողների հետ հանդիպման ժամանակ հայտարարեց Հայաստանի վարչապետ Կարեն Կարապետյանը։
«Մենք ներկայացրել ենք համալիր ծրագիր, որն, իմ կարծիքով, Հայաստանը որակապես նոր մակարդակի կհասցնի։ Այդ ծրագրում տնտեսության և հասարակության առջև ծառացած խնդիրների որակյալ ախտորոշում ենք կատարել, որի հիման վրա սահմանել ենք նաև այդ իրավիճակից դուրս գալու ուղիները», — ասաց վարչապետը։
Բացի այդ, վարչապետը նշեց, որ ծրագրի տեսական մասում նշված են ներդրումային ծրագրեր, որոնց արժեքը հասնում է 3,2 միլիարդ դոլարի։ Այդ գումարից 830-840 միլիոնը հնարավոր է Հայաստան բերել 2017 թվականին։
Կարապետյանի խոսքով՝ ներդրումային ծրագիրը հետաքրքիր է նրանով, որ այնտեղ նշված են աղբյուրները, այսինքն` ով է ներդրում կատարելու, ինչ աշխատատեղեր են բացվելու և այլն։
Ինչ վերաբերում է խոշոր ներդրումների մասին հայտարարություններին, որոնց մասին խոսում են քաղաքական մյուս ուժերը (մասնավորապես, «Ծառուկյան» դաշինքը հայտնել է 15-միլիարդանոց ներդրումի մասին — խմբ.), Կարապետյանը զերծ մնաց մեկնաբանությունից, քանի որ այդ ներդրումների ծրագիրը չի տեսել։
