ԵՐԵՎԱՆ, 30 մարտի – Sputnik. Բժշկասոցիալական փորձաքննության համակարգում ախտը արմատացած է: Sputnik Արմենիային տված հարցազրույցում, անդրադառնալով այս ոլորտի պաշտոնատար անձանց տարեվերջյան ձերբակալություններին, ասել է ՀՀ աշխատանքի և սոցիալական հարցերի նախարար Արտեմ Ասատրյանը:
Նախարարի խոսքով` համակարգի բարեփոխումներն ու արդիականացումը մեկնարկել է դեռևս 2014թ-ին: Նոր կարգի համաձայն` քաղաքացուն հաշմանդամության կարգ է շնորհվելու ոչ թե միայն բժշկասոցիալական փորձաքննության արդյունքով, այլև կարիքների ամբողջական գնահատմամբ:
«Առաջիկայում կառավարությունն այս ոլորտին վերաբերող մի շարք որոշումներ կկայացնի: Մենք անձնական հսկողություն ենք սահմանել բոլոր փորձաքննությունների նկատմամբ, յուրաքանչյուր պատասխանատու անձ հստակ ու շատ խիստ պատասխանատվություն է կրում: Այն դեպքում, երբ մարդուն տեսնելն ու փորձաքննելը պարտադիր չէ, և միայն փաստաթղթերը բավարար են, մենք իրականացնելու ենք փաստաթղթային փորձաքննություն»,- ասաց Արտեմ Ասատրյանը: Նման դեպքերը, մասնագետների գնահատմամբ, կկազմեն ընդհանուր դեպքերի շուրջ 40 տոկոսը:
Մնացած դեպքերի համար, ըստ Արտեմ Ասատրյանի, մշակվում են համապատասխան չափորոշիչներ, որոնց կիրառման արդյունքում հաշմանդամություն ստանալու կարգը կպարզեցվի:
«Այս բարեփոխումների շրջանակում նախատեսում ենք անհատական վերականգնողական ծրագրեր մշակել, որպեսզի քաղաքացին իր կարիքին համապատասխան ծառայություններ ստանա, և սրանով ավելի հասցեական ենք դարձնելու պետական միջոցների բաշխումը»,- ասաց նախարարը` հավելելով, որ հաշմանդամ քաղաքացին ավելի շատ կարիք ունի վերականգնվելու և հասարակություն վերադառնալու, մինչդեռ ներկա համակարգը նրան ավտոմատ վերածում է անաշխատունակ թոշակառուի:
Արտեմ Ասատրյանը վստահեցրեց, որ բարեփոխված համակարգի առաջին արդյունքները ՀՀ քաղաքացիները կզգան արդեն այս տարվա ընթացքում, առաջիկա ամիսներին:
Հիշեցնենք, 2016թ-ի դեկտեմբերի 29-ին ԱԱԾ-ն կաշառք ստանալու կասկածանքով ձերբակալել էր Բժշկասոցիալական փորձաքննության գործակալության պետին ու նույն գործակալության փորձաքննության բաժնի պետին: Ըստ քրեական գործով առաջադրված մեղադրանքի, գործակալության տարածքային բաժանմունքների պետերը քաղաքացիներին հաշմանդամության կարգ շնորհելու դիմաց նրանցից գումար էին պահանջել: Խուզարկության արդյունքում գործակալության պետի աշխատասենյակում շուրջ 3 մլն դրամ գումար էր հայտնաբերվել, որն, ըստ պաշտոնական վարկածի, տարածքային բաժանմունքների ղեկավարների հավաքած գումարն է եղել,որոշ մասը` առանձին ծրարներով:
ՀՀ աշխատանքի և սոցիալական հարցերի նախարար Արտեմ Ասատրյանի հետ հարցազրույցի ամբողջական տարբերակը կարող եք ընթերցել և դիտել Sputnik Արմենիա տեղեկատվական գործակալության կայքում։
