ԵՐԵՎԱՆ, 29 մարտի — Sputnik. Սամսուն քաղաքի Սելահիյեյի շրջանի թաղապետը հայտարարել է, որ քաղաքային իշխանությունները նախագիծն իրականացնելու նպատակով որոշում են կայացրել վերականգնել թաղամասի լքված հին տները: Այս մասին գրել է ermenihaber.am-ը։
Այդ տները պատկանել են ցեղասպանությունից առաջ այդտեղ ապրած հայերին, իսկ թաղամասի` մինչ այժմ էլ ժողովրդի շրջանում «Հայկական թաղամաս» անվանումը Սելահիյե է փոխվել միայն հանրապետական շրջանում:
«Սամսունի քաղաքապետ Յուսուֆ Զիյա Յըլմազի կարգադրությամբ` Սաֆրանբոլուի և Ամասիայի օրինակով հայերի լքված տները կվերականգնվեն և կօգտագործվեն զբոսաշրջային նպատակներով»,- գրում է թուրքական աղբյուրը:
Սելահիյեյի համայնքապետ Դերյա Բոզքուրթը նշել է, որ Սամսունի ամենաբանուկ «100-րդ տարվա ծառուղի» պողոտայի շրջակայքում բազմաթիվ հայկական տներ կան, որոնք անխնամության պատճառով փլուզման եզրին են հայտնվել:
«1900-ականների սկզբում Սամսունում ապրել են հայեր, հույներ ու մուսուլմաններ: Սելահիյեն հայկական թաղամաս էր: Տարածքում հայկական եկեղեցի, որբանոց և հոգևորականի կացարան է եղել:
Պատրաստվող նախագծով վերականգնվելու են այդ տները, և մեր թաղամասում զբոսաշրջային փողոց է հիմնվելու: Նախագծի համար անհրաժեշտ աշխատանքներն արդեն սկսվել են»,- ասել է Բոզթուրքը:
Նշենք, որ նախքան Հայոց ցեղասպանությունը, Սամսունում ապրել է 15.000 հայ, նրանց մեծ մասը՝ հայկական թաղամասում:
