ԵՐԵՎԱՆ, 29 մարտի — Sputnik. Ճապոնացիներն ու Նիրասակի քաղաքի հյուրերն արդեն կարող են տեսնել հայկական քանդակագործության մի մասնիկն իրենց քաղաքում։ Օրերս Ճապոնիայի Յամանաշի նահանգի Նիրասակի քաղաքում Ճապոնիայում ՀՀ դեսպան Հրանտ Պողոսյանի, Նիրասակիի քաղաքապետ Հիսաո Նայտոյի, Նոբելյան մրցանակի դափնեկիր Սատոշի Օմուրայի մասնակցությամբ բացվեց հայ քանդակագործ-խեցեգործ, ՀԽՍՀ ժողովրդական նկարիչ Հռիփսիմե Սիմոնյանի «Արմենուհի» կավե արձանը։ Այս մասին տեղեկացնում է Հայերն այսօրը։
Շնորհակալություն հայտնելով հայ անվանի քանդակագործին` արձանը թանգարանին նվիրելու կապակցությամբ՝ քաղաքապետ Նայտոն շեշտեց, որ նմանատիպ քայլերը խթանում են միմյանց նկատմամբ երկու ժողովուրդների հետաքրքրության աճին և երկուստեք ավելի ճանաչելի դարձնում մշակույթները։
Արարողությունից հետո Սատոշի Օմուրան ներկայացրեց իր անհատական հարուստ նկարչական հավաքածուն, որը հիմնականում ընդգրկում է ճապոնական գեղանկարիչների աշխատանքները՝ հավելելով, որ իր հավաքածուում առկա են երկու հայ անվանի գեղանկարիչների՝ Վլադիմիր Սահակյանի և Հրանտ Կարախանյանի գործերը:
