ԵՐԵՎԱՆ, 29 մարտի — Sputnik. Պաշտպանության նախարարի պորտֆելը Վիգեն Սարգսյանն ուզում է պահպանել նաև առաջիկա խորհրդարանական ընտրություններից հետո: Այս մասին պաշտպանական գերատեսչության ղեկավարը հայտնեց չորեքշաբթի ՊՆ-ում տեղի ունեցած մամուլի ասուլիսի ժամանակ:
Սարգսյանը հույս ունի, որ ընտրություններին հաղթանակ տանելու պարագայում ՀՀԿ-ի ղեկավարությունը նրան կթողնի նույն պաշտոնին:
«Հուսով եմ, որ առաջիկա ընտրություններում ՀՀԿ-ի հաղթանակի պարագայում գործընկերներս ինձ հնարավորություն կտան շարունակել աշխատանքը ՊՆ-ում: Կարծում եմ, որ ՊՆ-ն պետական կառավարման համակարգում առանցքային և կարևոր դեր ունի», — ասաց Սարգսյանը:
Նրա խոսքով՝ պաշտպանական ոլորտում մի շարք բարեփոխումներ պետք է իրականացվեն: Այդ բարեփոխումները հրատապ են և դրանք անմիջականորեն կանդրադառնան երկրի պաշտպանունակության վրա:
