ԵՐԵՎԱՆ, 29 մարտի — Sputnik. Հայաստանն «Իսկանդեր» կկիրառի, եթե նման անհրաժեշտություն ծագի, Sputnik Արմենիա մամուլի կենտրոնում ասաց ՀՀ ԱԺ փոխնախագահ Էդուարդ Շարմազանովը` մեկնաբանելով Սերժ Սարգսյանի`օրեր առաջ արած հայտարարությունը։
Արցախում զինծառայողների և նրանց ընտանիքի անդամների առջև իր ելույթի ժամանակ ՀՀ նախագահը հայտարարել էր. «Այսօր Հայաստանի զինուժի գերագույն գլխավոր հրամանատարն աչքը չի թարթելու, հարկ եղած դեպքում, «Իսկանդերի» համազարկի հրաման արձակելիս»։
Շարմազանովի խոսքով` նախագահի մեսիջը հստակ էր` ուղղված և՛ ներքին, և՛ արտաքին լսարանին։
«Արտաքին լսարանին ասվեց, որ մենք այս տարա ընթացքում զգալիորեն վերազինվել ենք, և այսօր առաջնագիծն ավելի պաշտպանված է ու կազմակերպված։ Հայաստանը բոլոր ջանքերը կգործադրի Ղարաբաղը պաշտպանելու համար, եթե «Իսկանդեր» կիրառելու անհրաժեշտություն լինի, ապա մենք դա կանենք»,- ասաց Շարմազանովը։
Ըստ նրա` անվտանգությունը երկրի ամենակարևոր ոլորտն է, առանց որի հնարավոր չէ երկրում տնտեսական զարգացում ապահովել։
