ԵՐԵՎԱՆ, 29 մարտի — Sputnik. «Եվրատեսիլ» երգի մրցույթի հայաստանյան ներկայացուցիչ Արծվիկը «Ֆեյսբուք» սոցիալական ցանցում նախաձեռնած ակցիայի շրջանակում վրացերեն է երգել։
«Շարունակում ենք Celebrate Diversity Challenge-ը։ Այս անգամ փորձել եմ կատարել վրացական Moxevis Qalo Tinao երգը, խիստ չդատեք»,- գրել է Արծվիկը
Հայ երգչուհին հաջորդ մարտահրավերն ուղղել է «Եվրատեսիլի» վրաստանյան ներկայացուցիչ Տակո Գաչեչիլաձեին։
Արծվիկի նախաձեռնությանն առաջինը արձագանքել էր Գերմանիայի պատվիրակ Լևինան, որը երգել էր «Կաքավիկը», այնուհետև հայերեն էր երգել նաև Կիպրոսի ներկայացուցիչ Հովիգը` ներկայացնելով «Երազ իմ երկիր հայրենի» ստեղծագործությունը։
«Եվրատեսիլ-2017» մրցույթն այս տարի կանցկացվի մայիսի 9-ին, 11-ին և 13-ին Կիևում: Հայաստանի ներկայացուցիչը՝ Արծվիկը, ելույթ կունենա մայիսի 9-ին՝ 1-ին կիսաեզրափակչի ընթացքում: Մրցույթն այս տարի կանցկացվի «Տոնենք բազմազանությունը» կարգախոսի ներքո:
