ԵՐԵՎԱՆ, 28 մարտի — Sputnik. ՀՀ ԱԺ փոխնախագահ Էդուարդ Շարմազանովը կարծում է, որ այն աժիոտաժը, վիրավորական ու լկտի պահվածքը, որ եղել է տարբեր քաղաքական գործիչների կողմից, անթույլատրելի է։ Այս թեմային նա անդրադարձավ Sputnik Արմենիա մամուլի կենտրոնում։
Ավելի վաղ ««Իրազեկ քաղաքացիների միավորում» ՀԿ-ի աշխատակիցները, ներկայանալով որպես ՀՀԿ շտաբի անդամներ, զանգահարել են 136 հանրակրթական դպրոցների և մանկապարտեզների տնօրենների և հարցուփորձ արել հավաքագրվող ցուցակների մասին: 136 տնօրեններից միայն 22-ն են հերքել ՀՀԿ-ի համար ցուցակների հավաքագրումը։
«Կուսակցության գլխավոր շտաբն օպերատիվ կերպով պատասխանել է այդ հրապարակմանը, ես ստորագրում եմ բոլոր հիմնավորումների տակ, մնացածն իրավապահ մարմինների գործն է»,- ասաց Շարմազանովը։
Նրա խոսքով` այդ տնօրեններին վիրավորելու բարոյական իրավունք չունի ոչ ոք, որովհետև կա անմեղության կանխավարկած։
«Կարիք չկա 1-2-3 կամ 20 հազար ձայն ավելի հավաքելու համար մոր ու քրոջդ տարիքի կնոջը վիրավորես», — ասաց նա՝ ընդգծելով, որ «մի քանի քաղաքական գործիչներ նյարդայնացել են, ինքը դա հասկանում է, բայց կյանքն ապրիլի 3-ից հետո էլ է շարունակվում»,- ասաց Շարմազանովը։
Ըստ նրա` եթե այդ ձայնագրություններն իրականություն են, նման դեպքերի համար կա քրեական հոդված։ Նաև պետք է պարզվի, թե այդ մարդիկ աշխատանքի ժամին են հայտարարություններ արել, թե ոչ։
