ԵՐԵՎԱՆ, 28 մարտի — Sputnik. «Իգլայի» գործով կալանավորված 3 անձանցից մեկը 1961թ-ին ծնված Սանասար Գաբրիելյանն է: Այս մասին Sputnik Արմենիային հայտնեց փաստաբան Կարապետ Աղաջանյանը: Փաստաբանի խոսքով` իր պաշտպանյալը Հայաստանում չի բնակվում, նա ռուսաստանաբնակ գործարար է, որը վերջերս էր ժամանել Հայաստան:
Սանասար Գաբրիելյանը 90-ականներին մասնակցել է Արցախյան ազատագրական պայքարին, պարգևատրվել է «Մարտական խաչով»:
«Սանասար Գաբրիելյանը հայրենասեր մարդ է, նա իր փոքրիկ բիզնեսից պարբերաբար բարեգործություններ է անում Հայաստանում: Անցյալ տարի էլ ապրիլյան պատերազմի օրերին Հայաստան էր եկել, որպեսզի օգնի Արցախին»,- ասաց փաստաբանը՝ վստահեցնելով, որ իր պաշտպանյալը քաղաքականության հետ որևէ առնչություն չունի:
Մեր հարցին, թե Սանասար Գաբրիելյանը ծանո՞թ է եղել Սամվել Բաբայանի հետ, փաստաբանն ասաց. «Ծանոթ են եղել, բայց մտերիմ հարաբերություններ չեն ունեցել»:
Աղաջանյանը հայտնեց նաև, որ իր պաշտպանյալը չի ընդունել իրեն առաջադրված մեղադրանքը և այն համարում է «անհիմն է և չպատճառաբանված»:
Սանասար Գաբրիելյանին մեղադրանք է առաջադրվել ՀՀ քրեական օրենսգրքի 235-րդ հոդվածի 2-րդ մասով և 235.1 —րդ հոդվածի 2-րդ մասի 1-ին կետով, այն է՝ մի խումբ անձանց կողմից ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը:
Պաշտպանը նշեց, որ առաջադրված մեղադրանքը հերքող հակափաստարկներ կան, որոնք, սակայն, չի կարող հրապարակել՝ ելնելով նախաքննական տվյալները չհրապարակելու պայմանից:
Սանասար Գաբրիելյանը ձերբակալվել է մարտի 22-ին, կալանավորվել՝ մարտի 24-ին:
Փաստաբանը բողոքարկել է կալանավորման մասին ընդհանուր իրավասության դատարանի որոշումը և մեզ հետ զրույցում նշեց, որ այն ևս իրականացվել է ՙհիմնազուրկ միջնորդության հիման վրա՚: Նրա խոսքով` նախաքննական մարմնի ներկայացրած միջնորդության մեջ ասված է եղել, որ քրեական գործի շրջանակում փնտրվում են անձինք, որոնց վրա Սանասար Գաբրիելյանը կարող է ազդեցություն ունենալ:
