ԵՐԵՎԱՆ, 28 մարտի — Sputnik. Հայաստանն ու Ադրբեջանը պետք է Ղարաբաղի հարցը լուծեն առանց միջնորդների։ Այս մասին հայտարարել է Բելառուսի նախագահ Ալեքսանդր Լուկաշենկոն ՀՀ արտակարգ և լիազոր դեսպան Արմեն Խաչատրյանի հետ հանդիպման ժամանակ։
«Հայերը, բելառուսները սուր հարցեր ունեն։ Օրինակ` Լեռնային Ղարաբաղը։ Ուղիղ կասեմ` դա մեր հարցը չէ, իմ հարցը չէ։ Մենք այնտեղ անելիք չունենք։ Կան հակամարտող կողմեր, որոնք պետք է լուծեն այս հարցը։ Բայց երբ Հայաստանի և Ադրբեջանի նախագահներն այս մասին հարցնում են ինձ, որտեղ էլ լինեմ, իմ դիրքորոշումը մեկն է` մարդիկ արժանի են արժանավայել կյանքի։ Հետո ասում եմ` չեմ հավատում, որ այսօր մարդիկ Լեռնային Ղարաբաղում ապրում են լավ ու արժանավայել կյանքով։ Արժանավայել ապրելու մասին ինչպե՞ս կարող է խոսք լինել, երբ ամեն օր զգում ես, որ գլխիդ կարող է ինչ-որ բան թափվել և կյանքդ կարող է ավարտվել։ Այդ պատճառով էլ մեր դիրքորոշումը հստակ է` Հայաստան ու Ադրբեջան` առանց միջնորդերի։ Սա իմ անձնական կարծիքն է` միջնորդներ պետք չեն. ո՛չ ուժեղ, ո՛չ թույլ, պետք է նստել սեղանի շուրջ և լուծել այդ հարցը»,- Լուկաշենկոյի կարծիքը ներկայացնում է նախագահի մամուլի ծառայությունը։
Նրա խոսքով` եթե երկրները ցանկանան որևէ մեկին որպես երաշխավոր վերցնել, ապա կարող են այդ հարցում երկուսով կողմնորոշվել։ Լուկաշենկոն կարծում է, որ չի կարելի է քաղաքականության մեջ շահարկել այդ խաղաքարտը, երբ մարդիկ են մահանում։
«Սա մեր կարծիքն է աշխարհի ցանկացած կետում ծագած հակամարտությունների վերաբերյալ»,- ասել է նա։
«Հիշեք Լապշինին։ Լսեք, ի՞նչ կապ ունի Հայաստանը։ Հայաստանը երբեք ինձ որևէ բան չի ասել Լապշինի համար։ Նրա նկատմամբ հետախուզում էր հայտարարել Ադրբեջանը։ Երբ նրան այստեղ ձերբակալեցին, ես մտածեցի` իսկ ինչո՞ւ նրան այստեղ ձերբակալեցին։ Թող նա ուր ուզում էր գնար։ Եթե անկեղծ խոսենք` փորձանք էր մեր գլխին։ Բայց ձերբակալեցին։ Ինտերպոլը գիտեր։ Մենք` որպես օրինապահ, հայտնեցինք, ինչպես ընդունված է։ Ո՞ւմ պետք է հանձնեինք նրանք։ Նրան, ով հետախուզում էր հայտարարել։ Ավելին` առաջին անգամ հրապարակավ կասեմ` նրան ոչ ոք չէր էլ ուզում վերցնել։ Ավելի ուշ սկսեցին այդ խաղաքարտը շահարկել»։
Լուկաշենկոն նշել է, որ հայերն ու բելառուսները մտերիմ ժողովուրդներ են եղել և այդպիսի էլ կմնան։
«Հայաստանն Ադրբեջանին տարբեր կերպ է վերաբերվում, սակայն ադրբեջանցիները մեզ մտերիմ ժողովուրդ են։ Ինչո՞ւ պետք է մենք Ադրբեջանի կամ Հայաստանի հետ գժտվենք։ Գուցե մենք մի օր պետք գանք Ադրբեջանին ու Հայաստանին։ Ոչ թե որպես միջնորդներ։ Այլ պարզապես պետք գանք։ Այդ պատճառով ինչո՞ւ մենք խցկվենք մի տեղ, որտեղ մեզ չեն խնդրում մտնել»,- ասել է նախագահը։
ՀՀ դեսպանն իր հերթին դրական խոսքեր է ասել Բելառուսի հասցեին` նշելով, որ շնորհակալ է ճակատագրին այդ երկրում անցկացրած տարիների համար։ Նա ընդգծել է երկու երկրի միջև առկա փոխըմբռնման հանգամանքը։
